"ტანკით ვერ შევალთ, ბუნებრივია, ვერ ავტეხავთ ქაოსს და უარესს ვერ დავიმართებთ", — ასე გამოეხმაურა მმართველი გუნდის დეპუტატი ნუკრი ქანთარია საოკუპაციო რეჟიმის მიერ 17 წლის მოზარდის გატაცებას. მისი თქმით, ხელისუფლება მაქსიმალურად იქნება ჩართული გათავისუფლებისთვის საჭირო ღონისძიებებში.

საოკუპაციო რეჟიმის წარმომადგენლებმა დღეს ერთი პირი გაიტაცეს. ადგილობრივების ინფორმაციით, ის სოფლის მიმდებარე ტყეში, რომელიც საოკუპაციო ხაზთან ახლოსა, მეგობრებთან ერთად შეშას აგროვებდა, რა დროსაც რუსმა სამხედროებმა შეამჩნიეს. მათი თქმით, სხვებმა გამოქცევა მოასწრეს, 17 წლის ბიჭი კი სამხედროებმა წაიყვანეს.

სახელმწიფო უსაფრთხოების სამსახურის განცხადებით, მიმდინარეობს მუშაობა აღნიშნული უკანონოდ დაკავებულის გასათავისუფლებლად. ამოქმედებულია ცხელი ხაზი და ინფორმირებულია ევროკავშირის სადამკვირვებლობლო მისია.