ქართული ოცნების წევრის, მამუკა მდინარაძის განცხადებით, საქართველოს ახლადარჩეული პარლამენტი პირველად ქუთაისში შეიკრიბება. ამის შესახებ მან გაზეთ ახალ თაობას განუცხადა. მდინარაძის თქმით, საქართველოს პარლამენტის ქუთაისიდან მთლიანად თბილისში გადმოტანის საკითხი იმდენად აქტუალური არ არის, რომ ის საკანონმდებლო ორგანომ მალევე განიხილოს:

"გაცილებით უფრო მნიშვნელოვანი პრობლემები აწუხებს საზოგადოებას და მათ გადაწყვეტაზე ვიზრუნებთ პირველ რიგში. ამ საკითხზე ქუთაისელების ინტერესებიც უნდა გავითალისწინოთ და პრემიერის ფრაზას მოვიშველიებ - სანამ ქუთაისს არ ავაგუგუნებთ, მანამდე მაინც არ უნდა გადმოვიტანოთ".

საქართველოს პარლამენტის თბილისში გადმოტანის საკითხი ჯერ კიდევ მე-8 მოწვევის პარლამენტში ქართულმა ოცნებამ დააყენა დღის წესრიგში. მათი თქმით, დეპუტატებს თბილისიდან ქუთაისში სამუშაოდ სიარული უჭირდათ და ეს დამატებით ხარჯებთანაც იყო დაკავშირებული. ბოლო პერიოდში ქუთაისში, ძირითადად, მხოლოდ პლენარული სხდომები იმართებოდა, ხოლო კომიტეტები საკანონმდებლო ორგანოს ძველ შენობაში, თბილისში მუშაობდა.