პრემიერმინისტრმა, გიორგი კვირიკაშვილმა საპარლამენტო არჩევნები შეაფასა და მოსახლეობას არჩევნების წარმატებით ჩატარება მიულოცა:

"დღეს ჩვენს ქვეყანაში დემოკრატიამ გაიმარჯვა. ეს არის ქართველი ხალხის ქართული სახელმწიფოს გამარჯვება. ჩვენმა ქვეყანამ კიდევ ერთი ნაბიჯი გადადგა წინ, უკეთესი მომავლისკენ, განვითარებასა და კეთილდღეობისკენ. ყველა შეფასებით, 2016 წლის საპარლამენტო არჩევნები იყო სამართლიანი, თავისუფალი, გამჭვირვალე და დემოკრატიული. დიდი მადლობა იმ მაღალი ნდობისთვის, რომელიც ჩვენს პოლიტიკურ გუნდს გამოუცხადეთ. ეს ჩემთვის და ჩვენი გუნდის ყველა წევრისთვის უდიდესი პასუხისმგებლობაა. მჯერა, რომ ღირსეულად გავართმევთ თავს ამ მოვალეობებს და ქვეყანას განვითარების სრულიად ახალ ეტაპზე გადავიყვანთ. ქართული ოცნების მხარდაჭერით თქვენ ხმა მიეცით თავისუფლებას, სტაბილურობას, ქვეყნის სწრაფ განვითარებას და ევროპულ მომავალს. მე პატივს ვცემ თითოეული ადამიანის თავისუფალ არჩევანს, მიუხედავად იმისა, რომელ პოლიტიკურ ძალას მისცა ხმა. მთავარია, რომ ყველამ ერთად შევძელით საქართველოს ისტორიაში ყველაზე დემოკრატიული საპარლამენტო არჩევნების ჩატარება და ეს არის უდიდესი წინ გადადგმული ნაბიჯი".

პრემიერმინისტრმა ჟურნალისტებსა და იმ ორგანიზაციებს, რომლებიც არჩევნებს აკვირდებოდნენ, მადლობა გადაუხადა.