სამხედრო მოსამსახურე, რომელმაც ტაილანდის ერთ-ერთ ქალაქში ცეცხლი გახსნა, სპეცოპერაციის დროს მოკლეს. ბოლო მონაცემებით, ჯარისკაცის თავდასხმის შედეგად 26 ადამიანი გარდაიცვალა და 50-ზე მეტი დაშავდა.

"ეს ტაილანდისთვის უპრეცედენტო შემთხვევაა და მინდა, რომ ეს უკანასკნელი იყო", — განაცხადა ტაილანდის პრემიერ-მინისტრმა, პრაიუთ ჩან-ოჩამ.

8 თებერვალს უმცროსმა ოფიცერმა, ჯაკრაფანთ თომამ ჯერ საკუთარი მეთაური მოკლა, შემდეგ სამხედრო ბაზიდან იარაღი და საბრძოლო მასალა მოიპარა. გზაში მან ქალაქის რამდენიმე ობიექტს ესროლა და საბოლოოდ სავაჭრო ცენტრ Terminal 21-ში მივიდა, სადაც უკვე იქ შეკრებილებს ესროდა.

სროლის დაწყების შემდეგ ადგილზე პოლიცია მივიდა და ასეულობით ადამიანი სავაჭრო ცენტრიდან გაიყვანა. პოლიციის ინფორმაციით, რვა მძევალი გაათავისუფლეს.

სროლის გარდა, თვითმხილველები ყვებიან, რომ სავაჭრო ცენტრში რამდენიმე აფეთქებაც მოხდა. ტაილანდის ჯანდაცვის სამინისტროს განცხადებით, სპეცოპერაციის დროს პოლიციის ერთი თანამშრომელი გარდაიცვალა, ხოლო ორი დაშავდა.

თავდასხმის დროს ჯარისკაცმა ფეისბუქზე რამდენიმე პოსტი გააკეთა. ერთ-ერთ გამოქვეყნებულ ფოტოში ის ხანძრის ფონზე დგას. სოციალურ ქსელში მისი ანგარიში უკვე დაბლოკილია.