მოსკოვში ნაფიცმსაჯულთა სასამართლომ გაამართლა კაცი, რომელსაც გეის მკვლელობა ედებოდა ბრალად. ინფორმაცია ამის შესახებ TV Rain-მა გაავრცელა. გადაწყვეტილება ნაფიცმსაჯულებმა 6 თებერვალს მიიღო.

გამოძიების ვერსიით, 2019 წლის 29 ივნისს ანტონ ბერეჟნი კურკსკის სადგურზე დანით თავს დაესხა რომან ედალოვსა და ევგენი ეფიოვს, რომლებიც გეი კლუბიდან ბრუნდებოდნენ. ევგენი ეფიმოვი თავდასხმას გადაურჩა, თუმცა რომან ედალოვი ადგილზე გარდაიცვალა.

როგორც გადარჩენილი ეფიმოვი ყვება, თავდამსხმელი მათ შეურაცხყოფას აყენებდა:

"აგრესია, სავარაუდოდ, ზუსტად ორიენტაციასთანაა დაკავშირებული... ჩვენ ყოველდღიური ტანსაცმელი გვეცვა და, ალბათ, ის გვითვალთვალებდა. ჩვენ ღამის კლუბიდან ვბრუნდებოდით".

ეფიმოვის ვერსიას იზიარებენ გარდაცვლილის ახლობლები და ლგბტ აქტივისტები და ამბობენ, რომ თავდასხმა ჰომოფობიურ ნიადაგზე მოხდა.

ანტონ ბერეჟნის მკვლელობასა და ცემაში ედებოდა ბრალი. როგორც ადვოკატმა განმარტა, ნაფიცმა მსაჯულებმა მკვლელობის ნაწილში ბერეჟნი გაამართლეს, თუმცა ცემის ნაწილში ის დამნაშავედ ცნეს.

სასამართლო სხდომაზე ბრალდებულმა ბრალი ნაწილობრივად აღიარა. ის ამტკიცებდა, რომ მკვლელობას არ აპირებდა და გარდაცვლილი დანაზე თვითონ დაეცა.