იუსტიციის მინისტრი და ვიცე-პრემიერი, თეა წულუკიანი ამბობს, რომ "ორი ან ოთხი" კონგრესმენის "დასპონსორებული" საკანონმდებლო აქტი საქართველოსა და აშშ-ს შორის მეგობრობას ვერ დააზიანებს. მისი თქმით, ბოლო რვა წლის განმავლობაში მთავრობას აშშ-სთან "საუკეთესო" სტრატეგიული ურთიერთობა აქვს.

"წარმოუდგენელია, რომ ორი ან თუნდაც ოთხი კონგრესმენის მიერ დასპონსორებული საკანონმდებლო აქტის პროექტის გამო, ჩვენმა სტრატეგიულმა პარტნიორმა გადადგას რაიმე ნაბიჯი, რომელიც საქართველოს და ქართველი ხალხის ინტერესს დააზიანებს. ის სპეკულაციები, რასაც აჟღერებს ოპოზიცია, რომ მგელი, მგელი მოდის, არავითარი მგელი არ მოდის", — განაცხადა წულუკიანმა.