ვაკის პარკის რეაბილიტაციის თბილისის მერია 30 მილიონი ლარის დახარჯვას აპირებს. როგორც მერია განმარტავს, რეაბილიტაცია 34 ჰექტარ ტერიტორიას ჩაუტარდება და პარკის გარდა, ცენტრალური ღერძის გასწვრივ არსებული კასკადისა და შადრევნების აღდგენა-რეაბილიტაციას ითვალისწინებს.

თბილისის მერის მოადგილის, მაია ბითაძის თქმით, პროექტი 2020-2021 წლებში უნდა განხორციელდეს.

"ჩვენთვის ცნობილი ნაწილის რეაბილიტაციის გარდა, ვაკის პარკსა და კუს ტბას შორის შესაბამის ბილიკებს მოვაწყობთ, რომელიც ამ ორ სივრცეს ერთმანეთთან დააკავშირებს. პარკის რეაბილიტაცია უახლოეს მომავალში დაიწყება და ვფიქრობთ, რომ განახლებულ, ჯანსაღ სივრცეს მივიღებთ, სადაც ყველა მოქალაქის ინტერესი იქნება გათვალისწინებული", — აღნიშნა თბილისის მერის მოადგილე მაია ბითაძემ.

ბითაძის თქმით, ვაკის პარკის კასკადი იმ სახით აღდგება, როგორიც 1980-იან წლებში იყო. მოეწყობა სპეციალური რეზერვუარი, რომელიც პარკს წყლის ფუნქციონირების ორ საშუალებას მისცემს.

მისივე ინფორმაციით, ვაკის პარკის რეაბილიტაციის პროექტის მომზადებაში ჩართული იყვნენ ბრიტანელი ექსპერტები, რომელთაც მწვანე ისტორიული კულტურული მემკვიდრეობის მქონე ძეგლების რეაბილიტაციის და გამოცდილება აქვთ.