ჩიკაგოს ო'ჰარეს საერთაშორისო აეროპორტში American Airlines-ის სამგზავრო თვითმფრინავს აფრენამდე რამდენიმე წამით ადრე ცეცხლი გაუჩნდა. ბოინგ 767 ჩიკაგოდან მაიამისკენ უნდა გაფრენილიყო. ინციდენტის დროს ბორტზე სულ 161 მგზავრი და ეკიპაჟის 9 წევრი იმყოფებოდა.

მიუხედავად დაუყონებლივი ევაკუაციისა, დაშავდა 1 ბორტგამცილებელი და 7 მგზავრი. ამერიკის ავიახაზების ინფორმაციით, ისინი საავადმყოფოში გადაიყვანეს.

სხვადასხვა სოციალურ ქსელში ვრცელდება მომხდარის ამსახველი დრამატული ვიდეო და ფოტო მასალა. როგორც თვითმხილველების მიერ გადაღებულ ვიდეოებზე ჩანს, ცეცხლი მარჯვენა ძრავს მოედო, მგზავრებმა კი თავის დაღწევა თვითმფრინავის მეორე მხრიდან შეძლეს.

ამერიკის შეერთებულ შტატებში დღეს ეს მეორე მასშტაბური ავიაინციდენტია. ფლორიდაში, ფორტ ლოდერდალეს საერთაშორისო აეროპორტში ფედექსის სატვირთო თვითმფრინავს დაშვებისას ერთ–ერთი შასი დაუზიანდა და ცეცხლი წაეკიდა.

ადგილობრივი მედიის ცნობით, შემთხვევის შედეგად არავინ დაშავებულა.