პატრიოტთა ალიანსის ლიდერი ირმა ინაშვილი რუსთავი 2-ზე, კურიერის პირდაპირ ეთერში NATO-ს თავდაცვის მინისტერიალზე, გენერალური მდივნის მიერ გაკეთებულ განცხადებას გამოეხმაურა. მისი თქმით, რუსეთმა ღიად დააფიქსირა საკუთარი პოზიცია საქართველოს ნატოში გაწევრიანებასთან დაკავშირებით და თავის მხრივ ალიანსი საქართველოს წევრობას არ სთავაზობს:

"ეს ცნობილი თემაა, NATO შემოდის საქართველოში და წვრთნებს აწარმოებს. რუსეთს ღიად აქვს აღიარებული, რომ ჩემთვის [რუსეთისთვის] საფრთხე არის მეზობელი ქვეყნების გაწევრიანება ნატოში, მაგრამ გვიღებს ჩვენ NATO? სიმართლე ვუთხრათ ჩვენს ხალხს და საზოგადოებას. ვუთხრათ ის, რასაც ამბობს გენერალური მდივანი, ობამა, ოლანდი, მერკელი, რომ სამწუხაროდ საქართველოს არ იღებენ ნატოში, სამაგიეროდ ალიანსი გეუბნება რომ ვითანამშრონმლოთ. კი ბატონო, ვითანამშრომლოთ სამხედრო სფეროში, სამეცნიერო ტექნოლოგიების სფეროში, დემოკრატიის სფეროში. ვითანამშრომლოთ, მაგრამ ჩვენი ქვეყანა რისკების ქვეშ დგას. NATO ვერ ახერხებს დაიცვას ჩვენი ქვეყანა, რომელიც არის კვლავ რისკების ქვეშ, გნებავთ იგივე რუსეთის მხრიდან, ვინაიდან იგი არ გვთავაზობს წევრობას. ამ სიმართლეს არ ეუბნებიან საზოგადოებას არც პოლიტიკური პარტიის ლიდერები. ამასობაში ჩვენმა ქვეყანამ მიწები დაკარგა, ვიდრე ნატო გვეუბნებოდა რომ კარი ღიაა".

დღეს, 27 ოქტომბერს თავდაცვის მინისტერიალზე, ნატოს გენერალური მდივანმა, იენს სტოლტენბერგმა ჩრდილოატლანტიკური საბჭოს შეხვედრის ფარგლებში განაცხადა, რომ საბჭომ შავი ზღვის რეგიონში ნატოს წარმომადგენლების გაძლიერების საკითხი განიხილა.