ქართული ოცნების დეპუტატი, ლადო კახაძე აცხადებს, ბუნებრივი აირის არასწორი მოხმარება პრობლემას ქმნის და ეს უნდა დარეგულირდეს. ამის შესახებ დეპუტატმა პარლამენტში რიგგარეშე სხდომაზე ისაუბრა, სადაც გაეროს კლიმატის ცვლილებების ჩარჩო კონვენციასთან შეერთებას განიხილავენ.

"დამერწმუნეთ, არანაკლებ პრობლემას ქმნის ბუნებრივი აირის არასწორი მოხმარება. მისი წვის პროდუქტები და ის ინდივიდუალური, რაც ჩვენ გაჭირვებამ გაგვაკეთებინა თავის დროზე, ამის რეგულირების დროც უნდა დადგეს. თორემ სხვა შემთხვევაში მეზობლები ნებსით თუ უნებლიეთ არასწორი გამონაბოლქვის მეოხებით ერთმანეთს წამლავენ", — განაცხადა კახაძემ.

2019 წლის დეკემბერში GAHP-ის (გლობალური ალიანსი ჯანდაცვისა და დაბინძურების შესახებ) მიერ გამოქვეყნებული ახალი მონაცემებით, გარემო ფაქტორებიდან ჯანმრთელობას ყველაზე დიდ საფრთხეს ჰაერის დაბინძურება უქმნის. ვარაუდობენ, რომ მსოფლიოში დაბინძურებას ყოველწლიურად 8 მილიონზე მეტი ადამიანი ეწირება.

კვლევის მიხედვით, ევროპაში დაბინძურებასთან დაკავშირებული სიკვდილიანობით საქართველო მეორე ადგილზეა, სადაც 100 000 ადამიანიდან 140-ის სიკვდილი ჰაერის დაბინძურებით არის განპირობებული.