იტალიაში, გვიან ღამით ორი მიწისძვრა მოხდა, რასაც ნგრევა მოჰყვა. იტალიაში მცხოვრები ქართველები ავრცელებენ ინფორმაციას დაშავებულების შესახებ.

რუსთავი 2-ის ინფორმაციით, ეპიცენტრთან ახლოს მცხოვრებმა ქართველებმა განაცხადეს, რომ დაშავებულებს შორის არიან ქართველები- ერთი სასულიერო პირი და რამდენიმე სტუდენტი. საზოგადოებრივ მაუწყებელთან სატელეფონო ინტერვიუში საქართველოს მოქალაქე, ქეთევან დონგუზაშვილი აცხადებს, რომ დაშავებულებს შორის ქართველები არ არიან. იტალიაში საქართველოს საელჩოდან კი მათ არავინ დაკავშირებია.

On.ge შეეცადა ინფორმაცია იტალიის რესპუბლიკაში საქართველოს საელჩოსთან გადაემოწმებინა. უწყების ინფორმაციით, იტალიური მხარე დაღუპულთა და დაშავებულთა შორის საქართველოს მოქალაქეების არსებობას არ ადასტურებს. იტალიის რესპუბლიკაში საქართველოს საელჩო მუდმივ კავშირზეა იტალიის შესაბამის სამსახურებთან.

იტალიის რესპუბლიკაში მომხდარ მიწისძვრასთან დაკავშირებით რომში საქართველოს საელჩოში მოქმედებს ცხელი ხაზი: (+39 333) 887 91 23.

საქართველოს საგარეო საქმეთა სამინისტროს საკონსულო დეპარტამენტში ასევე მოქმედებს ცხელი ხაზი: (+995 32) 294 50 50.

ორი ძლიერი მიწისქვეშა ბიძგი ამატრიჩედან 80 კილომეტრში მოხდა, სადაც აგვისტოს მიწისძვრამ სამასამდე ადამიანის სიცოცხლე იმსხვერპლა. პირველი მიწისქვეშა ბიძგის სიძლიერე 5,5 მაგნიტუდა, მეორესი კი 6,1 მაგნიტუდა იყო. პირველი ბიძგის ეპიცენტრი ქალაქ ვისოდან 9 კილომეტრში, მეორე კი ვისოდან 3,2 კილომეტრში დაფიქსრიდა. ინფორმაციას CNN, ამერიკის გეოლოგიური სამსახურის მონაცემებზე დაყრდნობით ავრცელებს.

ფოტო: CNN

სიენენ-ის ინფორმაციით ამ ეტაპზე დაშავებულების შესახებ ინფორმაცია არ ვრცელდება. დაზიანებულია ისტორიული შენობები, მათ შორის მე-15 საუკუნის ეკლესიაც.