გლდანის ციხეში მთავარი არხის მეწილესთან, გიორგი რურუასთან საგამოძიეობო უწყების წარმომადგენლები დნმ-ის ნიმუშის ასაღებად მივიდნენ. როგორც რურუას უფლებადმცველი შოთა კახიძე აცხადებს, დნმ-ის ნიმუშის აღება მისი ნების საწინააღმდეგოდ უღებენ.

"გენეტიკური ნიმუში უკვე აღებული აქვთ. უბრალოდ, უკანონოდ აქვთ აღებული და დაიტანეს ჩადებულ იარაღზე. აღნიშნული ქმედება მიმართულია იმისკენ, რომ გიორგი რურუასგან როგორმე ოფიციალურად მოიპოვონ დნმ-ის ნიმუში და იგი შეადარონ ან დაამთხვიონ იარაღზე ხელოვნურად დატანილ გენეტიკურ პროფილს", — განაცხადა შოთა კახიძემ.

გამომძიებელი კახაბერ მურადაშვილი ამბობს, რომ გიორგი რურუასგან დნმ-ის ნიმუშის ასაღებად სასამართლო განჩინება აქვთ.

"როგორ ჩავატარებთ, შედეგებს მოგახსნებთ დასრულების შემდეგ. წინასწარ რა მოხდება არ ვიცი. შესაბამისი პროპორციული ძალის გამოყენება სასამართლოს განჩინებაშია მითითებული. თუ საჭირო იქნება პროპორციული ძალის გამოყენება, შესაბამისად გამოვიყენებ პროპორციულ ძალას", — განაცხადა მურადაშვილმა.

გიორგი რურუა 18 ნოემბერს იარაღის უკანონო ტარების ბრალდებით დააკავეს. მისი უფლებადამცველი და პარტნიორი ნიკა გვარამია აცხადებს, რომ გიორგი რურუას იარაღი ჩაუდეს. დაკავებული ბრალს არ აღიარებს და ამბობს, რომ იარაღი მას საერთოდ არ უნახავს.

მოგვიანებით პროკურატურამ გიორგი რურუას ბრალი დაუმძიმა. პროკურატურის განცხადებით, ბრალს დაემატება ახალი მუხლი სასამართლო გადაწყვეტილების შეუსრულებლობა და მისი შესრულებისათვის ხელის შეშლა (სსკ 381 მუხლის პირველი ნაწილით გათვალისწინებული ქმედება).

ბრალდების მხარე აცხადებს, რომ გიორგი რურუამ უარი განაცხადა სასამართლოს განჩინების მიხედვით დნმ-სა და ხელის კვლევების ნიმუშის აღების თაობაზე.