"აი, რა კარგი ქენით, რომ წირვას დაესწარით. იმიტომ, რომ ყველაზე მეტად თქვენ გჭირდებათ", — ასე მიმართა ბათუმისა და ლაზეთის მთავარეპისკოპოსმა დიმიტრიმ საშობაო ღამეს ტაძარში მისულ ჟურნალისტებს. ვიდეოს აჭარის ტელევიზია ავრცელებს.

მეუფე დიმიტრის მიმართვის შემდეგ ჟურნალისტებმა იკითხეს, რატომ სჭირდებათ მათ წირვაზე დასწრება, რაზეც მან უპასუხა:

"ჩვენსავით ცოდვილები ხართ და იმიტომ".

საშობაო წირვისა და ქადაგების შემდეგ ჟურნალისტებმა ბათუმისა და ლაზეთის მიტროპოლიტს დეკანოზ გიორგი მამალაძის შეწყალებასთან დაკავშირებით დაუსვეს კითხვები. ის ამბობს, რომ მეუფე პეტრე ცაავას დიდი როლი აქვს გიორგი მამალაძის ციხეში ყოფნის გახანგრძლივებაში. მანვე აღნიშნა, რომ მოლოდინი ჰქონდათ, დეკანოზი სინოდის შუამდგომლობის შემდეგ გათავისუფლდებოდა.