გორში, სადაც ნაძვის ხის ზეიმი უნდა გაიმართოს, პრეზიდენტს საპროტესტო აქციით ხვდებიან. ცენტრალურ მოედანზე, სადაც ღონისძიებისთვის სცენაა მოწყობილი, აქტივისტები და ოპოზიციის წევრები საპროტესტო ბანერებით არიან მისული.

როგორც საკრებულოში ნაციონალური მოძრაობის წევრი, ვასილისა ჯაბახიძე რადიო თავისუფლებასთან ამბობს, სალომე ზურაბიშვილს უფლება არ აქვს გორის ცენტრალურ მოედანზე მივიდეს, რადგან აგვისტოს ომის დაწყებაში მან საქართველო დაადანაშაულა.

ვითარება მოედანზე მას შემდეგ დაიძაბა, რაც აქციის მონაწილეებმა, საკრებულოსთან მისვლა გადაწყვიტეს. მათ პოლიციელების ცოცხალი ჯაჭვი ადმინისტრაციულ შენობასთან მისვლის საშუალებას არ აძლევს.

პრეზიდენტი სალომე ზურაბიშვილი ყოველწლიურად საშობაოდ ნაძვის ხის ზეიმს აწყობს. როგორც პრეზიდენტის ადმინისტრაციის ვებგვერდზე წერია, ნაძვის ხის ზეიმზე მისული მოქალაქეები ქართული ესტრადის ვარსკვლავებსა და გორის თეატრის მსახიობებს მოუსმენენ. გარდა ამისა, მაყურებლის წინაშე წარდგება გორის ქალთა კაპელა და გორის გოგონათა გუნდი.