დღეს, 27 დეკემბერს ეროვნულ ბიბლიოთეკაში წიგნის საახალწლო ფესტივალი გაიხსნა, რომელზეც, როგორც ბიბლიოთეკის დირექტორი, გიორგი კეკელიძე ამბობს, უპრეცედენტო და ისტორიული აქცია გაიმართა:

"საქართველოში არსებული ყველა რელიგიური კონფესია და ეთნიკური ჯგუფი (მათ შორის მნიშვნელოვანია, რომ ოსებიც) შევკრიბეთ და ერთობლივი მიმართვა გააკეთეს მსოფლიოსადმი ვაჟა გაფრინდაშვილის გათავისუფლების მოთხოვნით. ჩვენთან ერთად იდგა ექიმის შესანიშნავი ოჯახი. დღესვე სპეციალური განცხადება გაავრცელა საქართველოს პენ-ცენტრმაც".

კეკელიძე მხარდაჭერისთვის მადლობას უხდის საქართველოს მართლმადიდებლ ეკლესიას, საპატრიარქოს, სახალხო დამცველთან არსებულ რელიგიათა და ეროვნულ უმცირესობათა საბჭოებს, ასევე სხვადასხვა რელიგიური თუ ეთნიკური გაერთიანების წარმომადგენლებს.

წიგნის საახალწლო ფესტივალი 2019 საქართველოს პარლამენტის ეროვნულ ბიბლიოთეკაში 27 დეკემბრიდან 29 დეკემბრის ჩათვლით გაიმართება.