ტელეკომპანია პირველის ეთერში, ინგა გრიგოლიას დღის ამბებში, პატრიოტთა ალიანსის ლიდერმა დავით თარხან-მოურავმა პარტიის ირგვლივ გავრცელებულ ხმებზე, არჩევნებთან დამოკიდებულებაზე და სამომავლო გეგმებზე ისაუბრა.

დავით თარხან-მოურავმა აღნიშნა, რომ მათ დიდი წვლილი მიუძღვით ხელისუფლების სათავეში მოყვანაში, თუმცა გავრცელებული ხმები თითქოს ალიანსი ქართული ოცნების ინტერესებს ატარებს სიმართლეს არ შეესაბამება:

"ის თეორია თითქო პატრიოტთა ალიანსი არის სატელიტი ქართული ოცნების და რასაც იქედან გვიბრძანებენ იმას ვაკეთებთ, ეს არის აბსოლუტური ბოდვა, პირდაპირ გეუბნებით. საქართველოს პატრიოტთა ალიანსი არის დამოუკიდებელი პოლიტიკური ძალა მე ბევრჯერ მითქვამს, რომ ჩვენ დიდი როლი ვითამაშეთ იმაში, რომ ეს ხელისუფლება მოსულიყო სათავეში და ბუნებრივია ამ ხელისუფლებაში გვყავს ბევრი მეგობარი".

დავით თარხან-მოურავმა აღნიშნა, რომ პატრიოტია ალიანსი არ აღიარებს არჩევნების შედეგებს, მაგრამ არ აპირებს პროტესტის გამოხატვას, რადგან არ სურს ალიანსი ერთადერთი იყოს ვინც ყველაფრით უკმაყოფილოა:

"ჩვენ თავიდანვე ვთქვით, არ მიგვაჩნია რომ ავიღეთ 5 პროცენტი. საქმე იმაშია, რომ ძალიან ბევრი ორგანიზაციაა, განსაკუთრებით საერთაშორისო ორგანიზაცია, რომელმაც შედეგები აღიარა არჩევნების. პრაქტიკულად ყველა პარტიამ აღიარა არჩევნების შედეგები. ამიტომ ახლა ისეთი რამ, მოხდეს რომ ჩვენ ერთადერთები ვიყოთ ვინც ყველაფრით უკმაყოფილოა არც ეს ვარგა, ამიტომ ჩვენ ვუფრთხილდები ახლა ყველა სიტყვას.

განცხადებებში ვართ ძალიან ფრთხილები სწორედ იმიტომ, რომ არც ისე გამოვიდეს, რომ მარტო ჩვენ ვართ უკმაყოფილოები, მაგრამ მეორე არსებობს მარტივი სიბრძნე: არის დრო როცა ადამიანი უნდა გაჩუმდეს."

დავით თარხან-მოურავმა აღნიშნა, რომ პარლამენტში შესვლის შემდეგ პატრიოტთა ალიანსი დაიწყებს ბრძოლას ქვეყნის აღმავლობისთვის და სიმართლისთვის.

"იქნება ბრძოლა ეს ბუნებრივია, მაგრამ ეს არ ნიშნავს, რომ ბრძოლა ქართული ოცნების დაკვეთით იქნება და მითუმეტეს არ ნიშნავს რომ ქართულ ოცნებასთან ბრძოლა იქნება. ბრძოლა სიმართლისთვის უნდა იყოს და არ აქვს მნიშნველობა ვისთან."

დავით თარხან-მოურავმა მაგალითად მოიყვანა, ქართული ოცნების მმართველობის პერიოდში, პატრიოტთა ალიანსის მიერ მოწყობილი საპროტესტო აქციები და აღნიშნა, რომ ხელისუფლებასთან კოორდინირებული მუშაობა მხოლოდ იმ საკითხებზე ჰქონდათ როცა ინტერესთა თანხვედრა იყო, წინააღმდეგ შემთხვევაში პატრიოტთა ალიანსი ხელისუფლების ყველაზე აქტიური ოპოზიციური პარტია იყო.