თვალთხარია გახარია — ბათუმში ჩასულ პრემიერ-მინისტრს მოქალაქეების სტვენითა და შეძახილებით შეხვდნენ.

გიორგი გახარია ბათუმში საზღვაო აკადემიაში ადმინისტრაციის წარმომადგენლებს შეხვდა. ამასთანავე, სამანქანო განყოფილება გახსნა, სადაც სტუდენტებმა პრაქტიკული კურსი უნდა გაიარონ.

შეხვედრის პარალელურად საზღვაო აკადემიის შენობასთან მოქალაქეების საპროტესტო აქცია მართავდნენ. ადგილზე მობილიზებული იყო პოლიცია.

შენობის დატოვებისას პრემიერი დემონსტრანტებთან ახლოს მივიდა და პოლიციას მიესალმა. მისმა მანქანამ ტერიტორიაზე სტვენისა და შეძახილების ფონზე დატოვა.

ბოლო დღეების მოვლენები

მას შემდეგ, რაც ქართული ოცნების დეპუტატებმა პროპორციული საარჩევნო სისტემის კანონპროექტი ჩააგდეს, საქართველოს მასშტაბით სხვადასხვა ქალაქებში საპროტესტო აქციები იმართება. ოპოზიციური პარტიები გაერთიანდნენ და შექმნეს ახალი პლატფორმა "ერთად ერთის წინააღმდმდეგ", რომლის მიზანიც გერმანული საარჩევნო მოდელის მოთხოვნაა.

აქტივისტებისა და პარტიის მხარდამჭერების საერთო პროტესტის ფარგლებში პიკეტირებული იყო მთავარი საკანონმდებლო ორგანო, რომლის შესასვლელებიც ხელისუფლებამ ორჯერ სპეცრაზმისა და წყლის ჭავლის გამოყენებით გახსნა.

აქციის დაშლის შემდეგ სრულად ოპოზიციურმა სპექტრმა და სამოქალაქო აქტივისტებმა პროტესტი ახალი ფორმა "მაინც დაგაბოქლომებთ" დაიწყეს. ისინი სხვადასხვა ადმინისტრაციულ შენობებსა და ქართული ოცნების დეპუტატების ოფისებს ბოქლომებს ადებენ.

მას შემდეგ, რაც პარლამენტის პიკეტი მესამედ დაანონსდა, ხელისუფლებამ პარლამენტის მიმდებარე ქუჩები რკინის კონსტრუქციებით ჩაკეტა. კონსტრუქციები ხელს უშლიდა მოქალაქეებს გადაადგილებაში. პოლიციამ გზები აქციის დაშლის შედეგ გაათავისუფლა.

აქციებმა მაჟორიტარი დეპუტატებისა და ოცნების ოფისთან გადაინაცვლა, სადაც აქტივისტებს მმართველი გუნდის მხარდამჭერები ხვდებოდნენ და ფიზიკურად უსწორდებოდნენ. გარდა ამისა, განახლდა საპროტესტო მოძრაობა "არა ნაცებს" და გაიმართა აქციები სახელად "დემიშიზაცია", რომელთა წევრები ნაციონალური მოძრაობის ოფისებს კვერცხებს და ცოცხებს ესროდნენ, მხარდამჭერებსა და აქტივისტებს კი ფიზიკურად უსწორდებოდნენ.