ქართული ოცნების ერთ-ერთი წევრი, დიმიტრი ხუნდაძე ამბობს, რომ 2024 წლის არჩევნების ორპალატიანი წესით ჩატარებასთან დაკავშირებით ამომწურავი პასუხები ვერ მიიღო. ამის შესახებ მან უმრავლესობის სხდომის დასრულების შემდეგ განაცხადა.

მისი თქმით, "არ არიან ცოტანი" და გააგრძელებენ თავისი ინიციატივის პარლამენტში განხილვას. მანვე აღნიშნა, რომ ახლა დაახლოებით 30 დეპუტატია მისი თანამოაზრე.

"ამომწურავი პასუხები ვერ მივიღეთ... გუნდიდან გასვლას არ ვაპირებ, მაგრამ ხალხში გასვლას ვაპირებ", — თქვა ხუნდაძემ.

პროპორციული საარჩევნო სისტემის ჩაგდების შემდეგ, კანონპროექტის მოწინააღმდეგე მმართველი პარტიის დეპუტატმა, დიმიტრი ხუნდაძემ სრულად მაჟორიტარულ სისტემაზე გადასვლის ინიციატივა გამოთქვა. მიუხედავად იმისა, რომ უმრავლესობის ლიდერებმა ინიციატივა დაიწუნეს, ხუნდაძემ პარლამენტში საინიციატივო ჯგუფი უკვე დაარეგისტრირა. გარდა ამისა, დეპუტატმა გამოთქვა იდეა, რომ ორპალატიანი პარლამენტი შეიქმნას. ხუნდაძემ აღნიშნა, რომ ეს ინიციატივა 2020 წლისთვის არ აქვს, თუმცა არ დაუკონკრეტებია, რომელი წლის არჩევნებს გულისხმობდა.