ქართული ოცნების დეპუტატი დიმიტრი სამხარაძე, რომელმაც რამდენიმე საათის წინ შეურაცხმყოფელი და უცენზურო პოსტი გამოაქვეყნა, საზოგადოებას ბოდიშს უხდის "ემოციური ლექსიკის" გამო, თუმცა იმავე პოსტში ისევ იგინება.

ფოტო: ფოტო ეკრანიდან / დიმიტრი სამხარაძის ფეისბუქგვერდი

პირველი პოსტი სამხარაძემ პარტიის ოფისთან მიმდინარე დაპირისპირების დროს გამოაქვეყნა. ის მიმდინარე მოვლენებში მიხეილ საკაშვილს ადანაშაულებდა და მას შეურაცხყოფას აყენებდა.

ფოტო: ფოტო ეკრანიდან / დიმიტრი სამხარაძის ფეისბუქგვერდი

დიმიტრი სამხარაძე ერთ-ერთია ოცნების იმ დეპუტატებს შორის, რომელსაც ბოლო 3 წლის განმავლობაში ხმა არცერთხელ ამოუღია და მიკროფონით არ უსარგებლია.

დღეს, 2 დეკემბერს ქართული ოცნების ახალგაზრდული ფრთის წევრებმა და პარტიის სხვა მხარდამჭერებმა ორბელიანის მოედანზე მიმდინარე კონცერტი დატოვეს და გადმოინაცვლეს ოფისთან, სადაც სიტყვიერ შეურაცხყოფას აყენებდნენ და ფიზიკურად უსწორდებოდნენ მოძრაობა #სირცხვილიას, გაბედეს და შეცვალეს აქტივისტებს.

აქტივისტები ამბობდნენ, რომ აგრესიული პირები მათ ესროდნენ შუშხუნებს, რომელიც ერთ-ერთ მათგანს თვალში მოხვდა. ისინი მოუწოდებდნენ პოლიციას, რომ დაეკავებინათ აგრესიული პირები, თუმცა უშედეგოდ.

აქცია რამდენს ბედავთ ოცნების ოფისთან მცხეთაში მომხდარი მოვლენების გასაპროტესტებლად დაიგეგმა, სადაც მოძრაობა გაბედეს აქტივისტებს ფიზიკურად გაუსწორდნენ ოცნების წევრები და მხარდამჭერები. გავრცელებულ კადრებში ჩანს, რომ ერთ-ერთ წაქცეულ აქტივისტს სახეში ურტყამენ ფეხს. ორი დაზარალებული საავადმყოფოში გადაიყვანეს.

მიხეილ სააკაშვილმა ერთ-ერთ ვიდეომიმართვაში განაცხადა, რომ პოლიციას ეს უკანონობა არ შერჩება და ყველა პასუხს აგებს. მან ხაზი გაუსვა, რომ ყველა მათგანის სახლის მისამართი იციან და დასაკავებლად სწორედ სახლში მიაკითხავენ.

ბოლო დღეების მოვლენები

მას შემდეგ, რაც ქართული ოცნების დეპუტატებმა პროპორციული საარჩევნო სისტემის კანონპროექტი ჩააგდეს, საქართველოს მასშტაბით სხვადასხვა ქალაქებში საპროტესტო აქციები იმართება. პროტესტის ფარგლებში პიკეტირებული იყო მთავარი საკანონმდებლო ორგანოც, რომლის შესასვლელებიც ხელისუფლებამ ორჯერ სპეცრაზმისა და წყლის ჭავლის გამოყენებით გახსნა.

აქციის დაშლის შემდეგ ოპოზიციამ და სამოქალაქო აქტივისტებმა პროტესტი ახალი ფორმა "მაინც დაგაბოქლომებთ" დაიწყეს. ისინი სხვადასხვა ადმინისტრაციულ შენობებსა და ქართული ოცნების დეპუტატების ოფისებს ბოქლომებს ადებენ.

მას შემდეგ, რაც პარლამენტის პიკეტი მესამედ დაანონსდა, ხელისუფლებამ პარლამენტის მიმდებარე ქუჩები რკინის კონსტრუქციებით ჩაკეტა. კონსტრუქციები ხელს უშლიდა მოქალაქეებს გადაადგილებაში. პოლიციამ გზები აქციის დაშლის შედეგ გაათავისუფლა.