გავრცელებულ ინფორმაციას იმის შესახებ, რომ ქართული ოცნება პროპორციულ საარჩევნო სისტემაზე პლებისციტის ჩატარებას დაანონსებს ოპოზიციაში პასუხობენ. მათი თქმით, ივანიშვილი და მისი გუნდის ჯერ ე.წ. გერმანულ მოდელს უნდა დათანხმდეს და მხოლოდ ამის შემდეგ გამართოს პლებისციტი.

"ივანიშვილი და ქართული ოცნება ნებისმიერი რამის მთქმელია. ოღონდ, მინიმალური საღი აზრის ფარგლებშიც კიდე უფრო მეტი აბსურდი იქნება ეს, ვიდრე ოქრიაშვილის აჯანყება ივანიშვილის წინააღმდეგ. თუ ამ ნაბიჯს არ გადადგამენ, პლებისციტი კი არა, რაც არ უნდა ილაპარაკონ პროტესტი გაგრძელდება. ვერ გაუძლებენ ამ პროტესტს და ჩამოიქცევიან", — განუცხადა ევროპული საქართველოს ლიდერმა გიგა ბოკერიამ მთავარს.

პლებისციტი არის ფარული კენჭისყრის გზით საერთო-სახალხო გამოკითხვა, რომლის შედეგები სახელმწიფო ხელისუფლების ორგანოებისთვის სარეკომენდაციო ხასიათისაა. კანონით პლებისციტს ნიშნავს საქართველოს პრემიერ-მინისტრი. პლებისციტის იდეა მმართველი პატიის დეპუტატ აკაკი ზოიძეს ეკუთვნის, რომელიც აცხადებდა, რომ სხვანაირად საზოგადოებაში პოლარიზაცია გაიზრდება.

მას შემდეგ, რაც ქართული ოცნების ე.წ. აჯანყებულმა დეპუტატებმა ჩააგდეს საკონსტიტუციო ცვლილებების პროექტი, რომლითაც ქვეყანაში 2020 წლის არჩევნები სრულად პროპორციული წესით უნდა ჩატარებულიყო, ოპოზიციისა და სამოქალაქო აქტივისტების საერთო პროტესტი დაიწყო. დაპირისპირებული ოპოზიციური ჯგუფები ერთი მოთხოვნის ირგვლივ გააერთიადნენ — ვადამდელი არჩევნების პროპორციული სისტემითა და ე.წ. გერმანული მოდელით ჩატარება.

პროტესტის ფარგლებში პიკეტირებული იყო მთავარი საკანონმდებლო ორგანო, რომლის შესასვლელებიც ხელისუფლებამ სპეცრაზმისა და წყლის ჭავლის გამოყენებით გახსნა. აქციის დაშლის შემდეგ დააკავეს 37 აქტივისტი, მათ ნაწილს ადმინისტრაციული პატიმრობა შეუფარდეს.

ოპოზიციამ და სამოქალაქო აქტივისტებმა პროტესტი ახალი ფორმა "მაინც დაგაბოქლომებთ" დაიწყეს. პროტესტის მონაწილეებმა სიმბოლურად უკვე "დააბოქლომეს" პროკურატურა, სახელმწიფო უსაფრთხოების სამსახური, მთავრობის კანცელარია, პრეზიდენტის ადმინისტრაცია და მმართველი პარტიის დეპუტატების ოფისები და ოლქები.

შეგახსენებთ, რომ პროპორციულ სისტემაზე გადასვლის პირობა ბიძინა ივანიშვილმა დადო, როდესაც 20-21 ივნისს განვითარებული მოვლენების გამო პროტესტი დაიწყო. პროპორციული სისტემა აქცია #სირცხვილიას მთავარი მოთხოვნა იყო.