საპარლამენტო უმრავლესობის ლიდერმა, გია ვოლსკიმ ქართული ოცნების ცენტრალურ ოფისში ბრიფინგი იმისთვის გამართა, რომ ნაციონალური მოძრაობის ხელისუფლებაში ყოფნის პერიოდი გაეხსენებინა.

ვოლსკიმ თქვა, რომ როდესაც ეს პარტია იყო მთავრობაში, პროპორციულ საარჩევნო სისტემაზე გადასვლას მხარს არ უჭერდა და ამის საილუსტრაციოდ მიხეილ სააკაშვილის მაშინდელი განცხადება წაიკითხა. ვოლსკიმ აღნიშნა, რომ ქართული ოცნება ერთადერთი ძალაა, რომელმაც ეს ცვლილება განახორციელა და 2024 წლიდან საარჩევნო სისტემა პროპორციულზე გადაჰყავს.

ამ განცხადების გაკეთების შემდეგ ვოლსკიმ ჟურნალისტების კითხვებს არ უპასუხა. მასთან ერთად მამუკა მდინარაძეც იმყოფებოდა, რომელმაც ასევე უკომენტაროდ დატოვა ოთახი.

ქართული ოცნება მუდმივად ცდილობს, რომ ყოფილ ხელისუფლებასთან თავის განსხვავებებზე ისაუბროს და მათ შორის ერთ-ერთი ბოლო განცხადება ეკუთვნის ირაკლი ღარიბაშვილს, რომელმაც თქვა, რომ აუცილებელია ამაზე კონცენტრირება.