18 ნოემბერს რუსთაველზე აქციის დაშლის დროს დაკავებულის საქმის განმხილველ სხდომაზე გაირკვა, რომ ვიდეომასალა, რომელიც შინაგან საქმეთა სამინისტროს თანამშრომელმა დანაშაულის დასამტკიცებლად მიიტანა, თვითონაც არ ჰქონდა ნანახი.

მოსამართლემ პოლიციელს ჰკითხა, რამდენწუთიანია მასალა და ვისი დაკავება იყო ასახული, რაზეც პასუხად მიიღო: "არ ვიცი, მეც არ მინახავს ჯერ".

პოლიციელის ამ პასუხზე დარბაზში დამსწრეებმა იცინეს. ბრალდების მხარემ ვერც იმ კითხვას გასცა პასუხი, რომელი ვიდეო, რომელი პირის დაკავებას ასახავდა.

ბოლო დღეების მოვლენები მოკლედ

ამჟამად პარლამენტის შენობა ბლოკირებული აღარ არის. აქციის მონაწილეები ამბობდნენ, რომ არ შეუშვებდნენ არც ერთ დეპუტატს. შესასვლელებში გაშლილი იყო კარვები და დააწყეს ტომრები, ევროპულმა საქართველომ ყველა შესასვლელ ჭიშკარს სიმბოლურად ბოქლომი დაადო.

ასევე, პიკეტი მოხსნეს პარლამენტის შესასვლელებს. აქციის დაშლისას მინიმუმ 37 ადამიანი დააკავეს. ამ ოპერაციის შემდეგ დეპუტატები პარლამენტში შევიდნენ და ბიუროს სხდომა გამართეს.

აქცია თბილისის ქუჩებში მას შემდეგ იმართება, რაც ბიძინა ივანიშვილის დაპირება არ შესრულდა. მმართველმა პარტიამ ჩააგდო საკონსტიტუციო ცვლილებების პროექტი, რომლითაც ქვეყანაში 2020 წლის არჩევნები სრულად პროპორციული წესით უნდა ჩატარებულიყო. მმართველი პარტიის ამ გადაწყვეტილებამ ოპოზიციური პარტიები საერთო მოთხოვნის ირგვლივ გააერთიანა. მოთხოვნას იზიარებენ სამოქალაქო სექტორის წარმომადგენლები და მოძრაობა ქვეყნის სამსახურში.