ქართული ოცნების გენერალური მდივანი, კახა კალაძე თბილისში დაწყებულ გაერთიანებული ოპოზიციის საპროტესტო აქციებს გამოეხმაურა და მათი ორგანიზება მთლიანად ნაციონალურ მოძრაობას დააბრალა. დღეს, 18 ნოემბრის ბრიფინგზე კალაძემ თქვა, რომ აქციის რეალური ორგანიზატორი იყო ნაციონალური მოძრაობა თავისი განშტოებებით:

"აქციის საბაბი პროპორციული სისტემის მოთხოვნაა, რეალური მიზეზი კი პოლიტიკური სისტების დესტრუქციულ რელსებზე გადაყვანა... ეს პოლიტიკური ძალა [ნაციონალური მოძრაობა] საკონსტიტუციო უმრავლესობით მართავდა ქვეყანას. მათ შერეული სისტემის პროპორციულით შეცვლა ერთხელაც არ უფიქრიათ. 2010 წლის საკონსტიტუციო რეფორმა ისე განხორციელდა რომ საარჩევნო სისტემის ცვლილების საკითხი არც კი განუხილავთ...".

პარლამენტის შენობა ბლოკირებულია. აქციის მონაწილეები ამბობენ, რომ არ შეუშვებენ არც ერთ დეპუტატს. შესასვლელებში გაიშალა კარვები და დააწყვეს ქვიშის ტომრები, ევროპულმა საქართველომ ყველა შესასვლელ ჭიშკარს სიმბოლურად ბოქლომი დაადო.

აქცია თბილისის ცენტრალურ ქუჩებში მას შემდეგ იმართება, რაც ბიძინა ივანიშვილის დაპირება არ შესრულდა. მმართველმა პარტიამ ჩააგდო საკონსტიტუციო ცვლილებების პროექტი, რომლითაც ქვეყანაში 2020 წლის არჩევნები სრულად პროპორციული წესით უნდა ჩატარებულიყო. მმართველი პარტიის ამ გადაწყვეტილებამ ოპოზიციური პარტიები საერთო მოთხოვნის ირგვლივ გააერთიანა. მოთხოვნას იზიარებენ სამოქალაქო სექტორის წარმომადგენლები და მოძრაობა #სირცხვილია.