მალხაზ მაჩალიკაშვილი, რომელიც შვილის მკვლელის დასჯას მესამე ზამთარია უშედეგოდ ითხოვს, ამბობს, რომ პარლამენტში შენობაში არც ერთ დეპუტატს არ შეუშვებენ. მაჩალიკაშვილი ერთ-ერთია იმ ადამიანებს შორის, რომელიც ბიძინა ივანიშვილის დაპირების შეუსრულებლობას აპროტესტებს.

"მთავრობა ყველაფერს გააკეთებს, რომ პროვოკაციები მოახდინონ; დაიჭირონ, ციხეში ჩაყარონ ხალხი — სხვა გეგმა ამათ არ აქვთ. ეს არის ხელიდან წასული გახრწნილი ხელისუფლება. ყველას მოვუწოდებ, პროვოკაციას ნუ წამოეგებიან.

რაც შეეხებათ პარლამენტარებს, ვინც ამაში ცდილობენ შესვლას, არავინ არ შევა, თუ შევლენ, სათითაოდ გამოვათრევთ კაბინეტიდან, ამის დღეც დადგება", — თქვა მაჩალიკაშვილმა.

პარლამენტის შენობა ბლოკირებულია. აქციის მონაწილეები ამბობენ, რომ არ შეუშვებენ არც ერთ დეპუტატს. შესასვლელებში გაიშალა კარვები და ჩააწყეს ქვიშის ტომრები, ევროპულმა საქართველომ ყველა შესასვლელ ჭიშკარს სიმბოლურად ბოქლომი დაადო. აქციის მონაწილეებმა რამდენიმე წუთის წინ პარლამენტში არ შეუშვეს პარლამენტის დეპუტატები.

აქცია თბილისის ქუჩებში მას შემდეგ იმართება, რაც ბიძინა ივანიშვილის დაპირება არ შესრულდა. მმართველმა პარტიამ ჩააგდო საკონსტიტუციო ცვლილებების პროექტი, რომლითაც ქვეყანაში 2020 წლის არჩევნები სრულად პროპორციული წესით უნდა ჩატარებულიყო. მმართველი პარტიის ამ გადაწყვეტილებამ ოპოზიციური პარტიები საერთო მოთხოვნის ირგვლივ გააერთიანა. მოთხოვნას იზიარებენ სამოქალაქო სექტორის წარმომადგენლები და მოძრაობა #სირცხვილია.