ქართული ოცნება პარლამენტის განათლების, მეცნიერებისა და კულტურის კომიტეტის თავმჯდომარე მარიამ ჯაშმაც დატოვა. ის მერვე დეპუტატია, რომელმაც დღეს უმრავლესობა დატოვა. მარიამ ჯაშმა აღნიშნა, რომ ეს გადაწყვეტილება კენჭისყრიდან სამი საათის შემდეგ მიიღო, რადგან არ სურდა გადაწყვეტილება ემოციური ფონით ყოფილიყო განპირობებული.

"მიუხედავად იმისა, რომ პირადად მე, ბუნებრივია, მხარი დავუჭირე პროპორციულ სისტემაზე გადასვლას, მიუხედავად იმისა, რომ შეიძლება დაუსრულებლად გაგრძელდეს დისკუსია, რომელი საარჩევნო სისტემა არის უკეთესი. ამ შემთხვევაში ჩვენ ორი თვის წინ ის პირობა, რომელიც მივეცით ჩვენს საზოგადოებას და საერთაშორისო თანამეგობრობას, 93 დეპუტატის თანხმობით და ხელმოწერით, ეს იყო პრინციპული საკითხი, რომ გაგვეტანა აღნიშნული გადაწყვეტილება", — თქვა მარიამ ჯაშმა.

დეპუტატმა აღნიშნა, რომ მისთვის ალბათ ყოველთვის საამაყოდ დარჩება ის ინიციატივები და ცვლილებები, რაც ქართული ოცნების ხელისუფლებამ მოიტანა, თუმცა ეს გადაწყვეტილება იყო პრინციპული, რომლიც დღეს უნდა მიეღო.

მას შემდეგ, რაც პარლამენტმა პროპორციულ საარჩევნო სისტემაზე გადასვლის კანონპროექტი ჩააგდო, უმრავლესობა მარიამ ჯაშის გარდა დღეს კიდევ შვიდმა დეპუტატმა დატოვა.

დღეს, 14 ნოემბერს ბიძინა ივანიშვილის დაპირება არ შესრულდა. ქართულმა ოცნებამ მხარი არ დაუჭირა კანონპროექტს, რომლითაც ქვეყანაში 2020 წლის არჩევნები სრულად პროპორციული სისტემით უნდა ჩატარებულიყო. კანონპროექტის ჩაგდების შემდეგ გადაიკეტა რუსთაველის გამზირი და ჩაინიშნა ოპოზიციური პარტიების საერთო ბრიფინგი.