"ახლა მე ვიტყვი, რომ ნინო სამყურაშვილი ჭამს ბავშვებს და დაუყოვნებლივ ვთხოვ პროკურატურას, რომ დაიწყოს გამოძიება ნინო სამყურაშვილის წინააღდეგ... ეს ახლა სერიოზული იქნება? ზუსტად ასეთი უსაფუძვლო ბრალდებებია", — ასე პასუხობს ადამიანის უფლებათა კომიტეტის თავმჯდომარე სოფო კილაძე მთავარი არხის ჟურნალისტის კითხვას, მეუფე იაკობის განცხადებებისა და პროკურატურის რეაგირების შესახებ.

დეპუტატი ამბობს, რომ თუ პროკურატურა ყველა "აბსურდულ განცხადებაზე" დაიწყებს გამოძებას, უწყების პარალიზება მოხდება. აქამდე მმართველ გუნდში ამბობდნენ, რომ მეუფე იაკობის განცხადებები სინოდის განსახილველია და არა სახელმწიფო უწყებების.

მეუფე იაკობმა ტელეკომპანია პირველის ეთერში ისაუბრა იმაზე, რომ ყოფილი პრემიერი, ყოფილი შს მინისტრი და სუს-ის უფროსი პატრიარქის "ჩამოშორებას" სთავაზობდნენ. მისი თქმით, ყველაზე კარგი ვარიანტი იყო პატრიარქის მკვლელობა.

მეუფე იაკობი ამბობდა, რომ არავინ აინტერესებდა და იმუქრებოდა, რომ ყველას "დედას იმას უზამდა" და პატრიარქისადმი ამ დამოკიდებულებას არ შეარჩენდა. საპატრიარქოს თქმით, იაკობმა საქციელი მოინანია და სინოდმა მას ტიტული შეუნარჩუნა და გაფრთხილება გამოუცხადა. თუმცა მეუფეებმა აღნიშნეს, რომ სხდომაზე განიხილეს იაკობის საუბრის მანერა და არა განცხადებების შინარსი.

რაც შეეხება იაკობის დასახელებულ პირებს, პრემიერ-მინისტრმა გახარიამ, რომელიც მაშინ შს მინისტრი იყო ბრალდებები უარყო. პროკურატურამ კი დანაშაულის ნიშნები გამორიცხა. უწყებამ განმარტა, რომ გამოძიების დაწყების საფუძველი ვერ გახდება განცხადება, "რომლის მნიშვნელოვანი ნაწილის სინამდვილეს განმცხადებელი თავად უარყოფს".