პარლამენტის ადამიანის უფლებათა დაცვის კომიტეტის თავმჯდომარის, სოფო კილაძის აზრით, ეკლესიასა და პატრიარქზე შტურმი მიდის. თუმცა, ამის მტკიცებულება არ აქვს. ასე გამოეხმაურა კილაძე მეუფე პეტრეს გუშინდელ განცხადებას, რომელმაც თქვა, რომ ილია მეორე "პიდარასტიის, მამათმავლობის ცოდვითაა" შეპყრობილი.

მისივე თქმით, პირადი გამოცდილებიდან ამბობს, რომ ასეთი პროცესები სპონტანურად არ ხდება, თუმცა, არც ამის მტკიცებულება აქვს.

"ასეთი პროცესების მიღმა კონკრეტული ძალები დგანან, რომელი ძალები არის ეს, ვერ გეტყვით... თავს შევიკავებ კონკრეტული განცხადებისგან, მაგრამ მგონია, რომ ასეთი არეულობა და შეტევები ეკლესიაზე დაუგეგმავად ვერ განხორციელდებოდა", — აღნიშნავს კილაძე.

ის ამბობს, რომ ერსაც და ბერსაც იმის ძალისხმევა და სულიერი სიძლიერე უნდა ჰქონდეს, რომ "ეკლესია, როგორც ჩვენი ქვეყნისთვის უმნიშვნელოვანესი ინსტიტუტი, ასეთ სკანდალებში არ გაეხვიოს".

გუშინ, 31 ოქტომბერს მეუფე პეტრემ საპატრიარქოს დატოვების შემდეგ თქვა, რომ ილია მეორე პიდარასტიის, მამათმავლობის ცოდვითაა შეპყრობილი". მისივე თქმით, მამათმავლობის მხილების გამო პატრიარქმა ის მღვდელმთავრობიდან გადააყენა.

მასალაში გამოყენებული მეუფე პეტრეს შეფასება გამოხატულია ჰომოფობიური სიტყვებით, თუმცა მაღალი საჯარო ინტერესიდან გამომდინარე On.ge მის სიტყვებს უცვლელად გთავაზობთ.