ადამიანის უფლებათა აქტივისტების ცნობით, 22 წლის ირანელ ქალს, რომლის სიკვდილით დასჯა ფეხმძიმობის გამო გადაიდო, სავარაუდოდ დღეს ჩამოახრჩობენ.

ზეინაბ სეკაანვანდი ქმრის მკვლელობისთვის გაასამართლეს, რომელიც, როგორც თვითონ ამბობს თვეების განმავლობაში სცემდა.

სეკაანვანდი ციხეში ხელახლა დაქორწინდა და წინა თვეში იმშობიარა კიდეც, თუმცა ექიმების თქმით, თანამესაკნის სიკვდილით დასჯის გამო მიღებული შოკის შედეგად ახალგაზრდა ქალის ბავშვი მშობიარობამდე 2 დღით ადრე, საშვილოსნოში დაიღუპა.

საერთაშორისო ამნისტიის ცნობით, სეკაანვანდი ღარიბი, კონსერვატიული, ირანულ-ქურთული ოჯახიდან მოდის და სახლიდან 15 წლის ასაკში გაიქცა, რათა თავის პირველ ქმარზე დაქორწინებულიყო.

ქალი ამბობს, რომ ქორწინება უკეთესი ცხოვრების ერთადერთ შანსად ესახებოდა. თუმცა ქორწილიდან ძალიან მალე ქმარმა მისი რეგულარული ცემა და სიტყვიერი შეურაცხყოფის მიყენება დაიწყო.

ახალგაზრდა ქალმა რამდენიმე საჩივარი შეიტანა პოლიციაში ქმრის წინააღმდეგ, თუმცა არც ერთი მათგანი არ გამოძიებულა. ქმარი უარს ამბობდა განქორწინებაზე. ხოლო როდესაც სეკაანვანდმა მშობლებთან დაბრუნება სცადა, ოჯახმა იგი არ მიიღო.

სეკაანვანდი 17 წლის იყო, როდესაც მისი ქმარი დაიღუპა. დაპატიმრების შემდეგ ქალმა, სავარაუდოდ ქმრის მკვლელობა აღიარა. თუმცა მისი თქმით, განყოფილებაში გატარებული 20 დღის განმავლობაში პოლიცია მუდმივად აწამებდა მას.