17 ქართული ფილმი რუსეთის ფილმსაცავ გოსფილმოფონდიდან ქართულ მემკვიდრეობას უბრუნდება. ინფორმაციას ამის შესახებ საქართველოს განათლების, მეცნიერების, კულტურისა და სპორტის სამინისტრო ავრცელებს.

უწყების განცხადებით, მათ შორისაა ფილმი, რომელიც დიდი ხნის განმავლობაში დაკარგულად ითვლებოდა: მიხეილ კალატოზიშვილის პირველი დამოუკიდებელი სარეჟისორო ნამუშევარი მათი სამეფო, რომელიც, ასევე, პირველი ქართველი ქალი რეჟისორის, ნუცა ღოღობერიძის სადებიუტო ნამუშევარს წარმოადგენს.

სამინისტროს ინფორმაციით, აღნიშნული ფილმები 1926 წლიდან 1930 წლამდე პერიოდშია გადაღებული და სიძველის გამო საწყისი მასალები სავალალო მდგომარეობაშია. მათი თქმით, სწორედ ეს იქცა პრიორიტეტად ფილმების შერჩევისას.

ამ ეტაპზე საქართველოში შემდეგი ფილმები ჩამოვა:

• მათი სამეფო (1928) — რეჟისორები კალატოზიშვილი, ღოღობერიძე;
• ხანუმა (1926); ორი მონადირე (1927); ჯანყი გურიაში (1928) — რეჟისორი ალექსანდრე წუწუნავა;
• გოგი რატიანი (1927); კრაზანა (1928); კომუნარის ჩიბუხი — რეჟისორი კოტე მარჯანიშვილი;
• ბელა (1927) — რეჟისორი ვლადიმერ ბარსკი;
• გიული (1927) — რეჟისორი ნიკოლოზ შენგელაია;
• იბრაჰიმი და გოდერძი (პირველი და უკანასკნელი – 1927); ღრუბელთა თავშესაფარი (ცხოვრებასთან შეხვედრა – 1928) — რეჟისორი ზაქარია ბერიშვილი;
• ნორჩი მფრინავი (1928) — რეჟისორი ნიკოლოზ კახიძე;
• ქალი ბაზრობიდან (1928) — რეჟისორი გიორგი მაკაროვი;
• ახალგაზრდობა იმარჯვებს (1928) — რეჟისორი მიხეილ გელოვანი;
• ჩემი ბებია (1928 -ძველი ვერსია) — რეჟისორი კოტე მიქაბერიძი;
• საბა (1929) — რეჟისორი მიხეილ ჭიაურელი;
• მონანიება (1986) — რეჟისორი თენგიზ აბულაძე;

უწყებაში ამბობენ, რომ ქართული კინომემკვიდრეობის სამშობლოში დაბრუნების პროცესი 2020 წელსაც გაგრძელდება და პრიორიტეტი კვლავ 20-იანი წლების ქართული ფილმები იქნება. მათივე თქმით, აღნიშნული ეტაპის დასრულების შემდეგ, ამ პერიოდის ქართული კინომემკვიდრეობა სამშობლოში სრულად დაბრუნდება.

სამინისტროს განცხადებით, მონანიების ჩვენებას კანის კინოფესტივალი 2 წელია ითხოვს სექციაში Cannes Classics, თუმდა საქართველოში არსებული ასლის დაბალი ხარისხის გამო, ეს აქამდე ვერ ხერხდებოდა. მათი თქმით, ამ ფილმის დაბრუნება კანის კინოფესტივალზე ჩვენების საშუალებას მოგვცემს.

გოსფილმოფონდში დაცული ქართული კინოარქივის სრულად საქართველოში დაბრუნების შეთანხმებას ხელი 2014 წელს მოეწერა. ისტორიული მნიშვნელობის დოკუმენტის თანახმად, რუსეთის ფედერაციის სახელმწიფო კინოფონდი საქართველოს ეტაპობრივად გადმოსცემს 1921 წლიდან 1991 წლამდე გადაღებულ და ფონდის არქივში დაცულ ქართულ ფილმებს. ამ დროისთვის საქართველოში უკვე 51 ფილმი დაბრუნდა.