იუსტიციის უმაღლესი საბჭოს არამოსამართლე წევრი ანა დოლიძე ხელისუფლებას სთავაზობს, რომ დავით გარეჯს დაცული ტერიტორიის სტატუსი მიენიჭოს. მისი თქმით, ეს გადაწყვეტილება დაძაბულობას განმუხტავს.

"დაცული ტერიტორიის სტატუსი საშუალებას მოგვცემ, რომ დავით გარეჯი გადაიქცეს მსოფლიო მემკვიდრეობის ძეგლად გეოპოლიტიკური მნიშვნელობის გეოპოლიტიკური მნიშვნელობის რეგიონულ ობიექტად, რომლის საერთო სარგებლობა ტურისტული, ეკოლოგიური, ეკონომიკური და კულტურული საშუალებით გვექნება ორივე მხარეს. ეს განმუხტავს დაძაბულობას ჩვენსა და აზერბაიჯანს შორის", —- თქვა ანა დოლიძემ.

საქართველო-აზერბაიჯანის საზღვარზე, დავით გარეჯის მონასტრის მონაკვეთზე რამდენიმე კვირის წინ გადაადგილებაზე შეზღუდვები იყო დაწესებული. მოგვიანებით, 11 ოქტომბერს პრემიერმა თქვა, რომ ქართველი სამღვდელოებისთვის დავით გარეჯის კომპლექსში არსებული ყველა მონასტერი გაიხსნება.

დავით გარეჯთან დაკავშირებით საქართველო-აზერბაიჯანის საზღვარზე ვითარება ბოლო თვეების განმავლობაში რამდენჯერმე დაიძაბა. აპრილში სამონასტრო კომპლექსთან გზა გადაკეტილი იყო ოთხი დღის განმავლობაში, თუმცა შემდგომში გაიხსნა. საზღვრის დადგენის საკითხზე სპეციალური კომისია მუშაობს, რომელშიც აზერბაიჯანული და ქართული მხარეების წარმომადგენლები შედიან.

14 ივლისს დავით გარეჯის სასაზღვრო მონაკვეთზე ადგილობრივ მოსახლეობასა და აზერბაიჯანელ მესაზღვრეებს შორის დაპირისპირება მოხდა. საგარეო საქმეთა მინისტრის მოადგილის, ლაშა დარსალიას განმარტებით, ინციდენტის შემდეგ აზერბაიჯანულმა მხარემ მის მიერ კონტროლირებად ტერიტორიაზე მესაზღვრეების რაოდენობა გაზარდა და ლოჯისტიკური უზრუნველყოფისთვის საჭირო დროებითი ინფრასტრუქტურა განათავსა. პარალელურად, გაიზარდა ქართველი მესაზღვრეების რაოდენობაც.