"განცდა მრჩება, თითქოს, აი, პროვოცირებენ და სტრატეგიულ ამოცანად დაისახეს, იგივე [გიგა] ბოკერიამ, ჩვენი დისკრედიდაცია", — განაცხადა ნაციონალური მოძრაობის ლიდერმა, ნიკა მელიამ მთავარი არხის ეთერში. დეპუტატი ამბობს, რომ არ იცის რა არის ამის მიზანი.

მისი თქმით, ევროპული საქართველოს ბევრი წევრი მისი მეგობარია და პარტიის გაყოფის შემდეგ ურთიერთობა არ გაუწყვეტია, მაგრამ ბოკერიას ვერაფერი გაუგო.

"თუმცა, ამ ცალკე აღებულ პოლიტიკოსს [გიგა ბოკერიას] ვერაფერი ვერ გავუგე სიმართლე გითხრათ. რა უნდა ვერ გავიგე. გასაგებია, რომ განსხვავება უნდა აჩვენო, მაგრამ არა იმედანად, რომ უნებლიედ დაასხა ივანიშვილის წისქვილზე წყალი", — განაცხადა მან.

რამდენიმე დღის წინ გიგა ბოკერიას დაუპირისპირდა ნაციონალური მოძრაობის ლიდერი და ექსპრეზიდენტი მიხეილ სააკაშვილიც. მან ბოკერია "ქართული, ქრისტიანული ფასეულობებისგან დისტანცირების" გამო გააკრიტიკა. მაშინ მელიამ თანაგუნდელებისგან განსხვავებით სააკაშვილის პოზიცია არ შეაფასა და კითხვა დასვა: "ჩემს ადგილას რას დაწერდით ან რას იტყოდით?". მას შემდეგ კი, რაც სააკაშვილის განცხადებას კრიტიკა მოყვა დაწერა: "მელია კი ვარ, მაგრამ ის დროა, დათვივით დავიძინო რამდენიმე დღით, სანამ ვნებები ჩაცხრება".

დღევანდელ ეთერში კი მან აღნიშნა, რომ მიხეილ სააკაშვილი არ უნდა აკეთებდეს კომენტარს გიგა ბოკერიაზე:

"მითუმეტეს იმ სახით, რაც გააკეთა და არ მომეწონა. მართლა არ მომეწონა ფორმა."