თამთა თოდაძის მხარდასაჭერად დღეს, 7 ოქტომბერს, 19 საათზე საქართველოს მთავარ პროკურატურასთან აქცია იმართება. თოდაძე მის უფროს, თბილისის საკრებულოს დეპუტატს, ილია ჯიშკარიანს ცემასა და სექსუალურ ძალადობაში ადანაშაულებს.

"მთავარი პროკურორისაგან მოვითხოვთ სამართლიანი გამოძიების წარმართვას და დეპუტატ ილია ჯიშკარიანისათვის დაუყოვნებლივ ბრალის წაყენებას. ეს არ არის მხოლოდ თამთას ბრძოლა, ეს ყველა ქალის ბრძოლაა საქართველოში", — აცხადებენ აქციის ორგანიზატორები.

ილია ჯიშკარიანის მხრიდან თანამშრომლის სავარაუდო სექსუალური შევიწროების შესახებ ცნობილი 4 ოქტომბერს გახდა. ძალადობის სავარაუდო მსხვერპლი მთავარ არხთან ყვებოდა, რომ ჯიშკარიანმა მასზე სექსუალური ძალადობა სცადა, როცა გაქცევის შემდეგ კი ფიზიკურად იძალადა. შინაგან საქმეთა სამინისტრომ გამოძიება სამი მუხლით დაიწყო.

მედიაში ამ ინფორმაციის გავრცელების შემდეგ თამთა თოდაძის დედამ თქვა, რომ ილია ჯიშკარიანის მეგობარი მასთან მივიდა და მორიგება შესთავაზა. როგორც მან ჟურნალისტებს უთხრა, მორიგების პირობა მან არ იცის, თუმცა საკითხი ბრალდების უარყოფას ეხებოდა.