დღეს, 7 ოქტომბერს პრეზიდენტმა სალომე ზურაბიშვილმა გერმანელ კოლეგასთან, ფრანკ-ვალტერ შტაინმაიერთან გამართულ შეხვედრაზე თქვა, რომ საუბრის მთავარი თემა "კონფლიქტურ სიტუაციას" ეხებოდა, რაც, მისივე შეფასებით, "ნებისმიერ დროს შეიძლება გადაიზარდოს უფრო სერიოზულ სიტუაციაში".

"ვისაუბრეთ იმ აუცილებლობაზე, რასაც მე ვუხსენებ ჩვენს პარტნიორებს, რომ აუცილებელია, სხვა კონფლიქტთან ერთად, უკრაინის კონფლიქტთან ერთად საქართველო არ იქნას მივიწყებული, რომ ჩვენს ოკუპირებულ ტერიტორიებზე. საკმაოდ დაძაბულია სიტუაცია და ნებისმიერ დროს შეიძლება გადაიზარდოს უფრო სერიოზულ სიტუაციაში. აუცილებელია, დეესკალაცია და მეორეს მხრივ, რამე გამოსავლის ძიება. ერთ-ერთი მიმართულებაა გაძლიერება იმ ფორმატების, რაც არსებობს, ასევე, ევროკავშირის სადამკვირვებლო მისიის გაზრდა", თქვა პრეზიდენტმა.

ოფიციალური ვიზიტის ფარგლებში, ფრანკ-ვალტერ შტაინმაიერი პრემიერ-მინისტრ გიორგი გახარიას, პარლამენტის თავმჯდომარეს არჩილ თალაკვაძეს, პატრიარქს ილია მეორეს შეხვდება.

დღევანდელ პრესკონფერენციაზე გერმანიის პრეზიდენტმა თქვა, რომ ის ცხინვალის რეგიონთან, საოკუპაციო ხაზთან მივა სიტუაციის გასარკვევად, სადაც, ასევე, ევროკავშირის სადამკვირვებლო მისიის წევრებს შეხვდება.