რესპუბლიკელების ლიდერმა, დავით უსუფაშვილმა არჩევნების შედეგები შეაფასა:

"მიმაჩნია, რომ 8 ოქტომბერს მოქალაქეებს თავისუფალი არჩევანის გაკეთების გაცილებით უკეთესი არჩევანი ჰქონდათ, ვიდრე წინა არჩევნების დროს და ეს წინ გადადგმული ნაბიჯია. საარჩევნო პროცესში ბევრი სერიოზული ხარვეზი და დანაშაული ნიშანი იყო, მაგრამ მიუხედავად ამისა, არ არსებობს არანაირი საფუძველი იმისთვის, რომ არჩევნების ლეგიტიმურობა ეჭვქვეშ დადგეს. არჩევნები შედგა, არჩევნები დასასრულებელია, ვინაიდან უმეტეს ოლქებში მეორე ტურია ჩასატარებელი. შედეგად, მივიღებთ ახალ პარლამენტსა და ახალ პოლიტიკურ რეალობას და ამ მიმართულებით უნდა იყოს მეტი განსჯა

თუმცა, ამ პროცესშიც ვისურვებდი ყოფილიყო მეტი ორგანიზებულობა და ჩვენი როლების უკეთესი გააზრება. ეს ეხება პოლიტიკურ პარტიებს, საარჩევნო ადმინისტრაციას, ეგზიტპოლების შემკვეთებს და სხვა. კერძოდ, საარჩევნო ადმინისტრაციაში შეინიშნებოდა კვალიფიკაციის ნაკლებობა. შემაშფოთებელია ჩემთვის, როდესაც არჩევნების შედეგების გამოქვეყნების პროცესში ფარული ხელი იგრძნობოდა იმის უზრუნველსაყოფად, რომ მოსახლეობას საბოლოო შედეგებზე ინფორმაცია პორციებად, რაღაც გარკვეული ლოგიკით მიეღო. მე ვისურვებდი, რომ საარჩევნო ადმინისტრაციას არ აინტერესებდეს, ვისთვის რა ციფრის უფრო სასურველი არჩევნების დასაწყისში თუ არჩევნების ბოლოს.

სამწუხაროდ, ეს იყო გაგრძელება იმ ტენდენციების, რომელებიც წინასაარჩევნოდ მრავლად ვნახეთ: შემთხვევით სწორ დროს გამოქვეყნებული ფარული ჩანაწერები, შემთხვევით სწორ დროს აღმოჩენილი იარაღის სამალავები და ა.შ. ასე სწორად შემთხვევით შერჩეული საუბნო კომისიის ოქმები, რომლებიც ვიღაც პარტიისთვის მაქსიმალურ შესაძლო შედეგს აჩვენებენ, სხვისთვის მინიმალურად შესაძლოს და შემდგომ პროცესში ეს შედეგები რაღაც ლოგიკით იმ საზღვრამდე მიდის, რაც დღეს ვიხილეთ. ამასობაში ეს შედეგები შემთხვევით ემთხვევა ეგზიტპოლების შედეგებს, რომლებმაც საბოლოოდ დაამტკიცეს თავიანთი უსუსურობა და არაობიექტურობა, რადგან ვხედავთ პოლიტიკურ ძალებს, რომლებიც ამ იარაღით მანიპულირებენ".