ქართული ოცნების აღმასრულებელმა მდივანმა, ირაკლი კობახიძემ ბრიფინგი გამართა და განაცხადა, რომ 8 ოქტომბერს საპარლამენტო არჩევნებში მონაწილე ყოველმა მეორე მოქალაქემ ხმა ქართულ ოცნებას მისცა, შედეგად კი აღნიშნულმა პოლიტიკურმა ძალამ გაიმარჯვა:

"არჩევნები სამართლიან და მშვიდობიან გარემოში ჩატარდა, რასაც ცხადყოფს საერთაშორისო და ადგილობრივი სადამკვირვებლო მისიების ანგარიშები. ჩვენ მადლობას ვუხდით ამომრჩეველს ნდობისთვის, აღვნიშნავთ, რომ ჩვენმა 23-მა მაჟორიტარმა კანდიდატმა პირველივე ტურში მოიგო არჩევნები, დანარჩენებს კი ხმების მხოლოდ მცირე რაოდენობა დააკლდათ იმისთვის, რომ პირველივე ტურში მოეპოვებინათ გამარჯვება. აქიდან გამომდინარე, დარწმუნებულები ვართ, რომ არჩევნების მეორე ტურში ჩვენი ყველა კანდიდატი მოიპოვებს გამარჯვებას და ქართული ოცნება მოიპოვებს საკონსტიტუციო უმრავლესობას საქართველოს პარლამენტში".

კობახიძემ განმარტა, რომ პარტიაში არჩევნების მეორე ტურებისთვის მზადება უკვე დაიწყო.