დამოუკიდებელმა დეპუტატმა ეკა ბესელიამ თქვა, რომ მმართველი გუნდის წევრებს პირადი ცხოვრების ამსახველი კადრებით აშანტაჟებენ. მისი თქმით, ამ ფაქტების შესახებ თავად ამ ადამიანებისგანაც იცის.

"ყველამ საკუთარ შინაგან გაუბედაობას, თუ გარკვეულ მუხრუჭებს, თავად უნდა გადააბიჯოს. ეს ისეთი საკითხია, რომელზედაც ვერავინ სხვა ვერ ისაუბრებს თუ არა თავად ის ადამიანი ან ადამიანები, რომლებიც ამ ყველაზე ამორალური და აკრძალული მეთოდების გამოყენებით გარკვეულ გავლენას ექვემდებარებიან", — თქვა ეკა ბესელიამ მედიასთან საუბრისას.

ეკა ბესელიას თქმით, მოქმედი ხელისუფლება იგივე ამაზრზენ მეთოდებს იყენებს, რასაც წინა ხელისუფლება. მისი თქმით, მსგავსი სისტემა არ უნდა შენარჩუნდეს და მთავრობა უნდა შეიცვალოს.

პოლიტიკოსის პირადი ცხოვრების კადრები სოციალურ ქსელებში არაერთხელ გავრცელდა, მათ შორის, 28 და 31 იანვარს. იმავე პოლიტიკოსის კადრები კიდევ ერთხელ, 26 მარტს გავრცელდა. მაშინ პოლიტიკოსმა განაცხადა, რომ ვიდეოს შესახებ უწყება ინფორმირებული არ იყო და მათ თავად აცნობა. მეორე დღეს, 27 მარტს შსს-მ ვიდეოს Youtube-ზე ატვირთვის ბრალდებით ერთი პირი დააკავა. 22 ივნისს ეკა ბესელიამ რუსთავი 2-თან საუბარში თქვა, რომ ისევ პასუხგაუცემელია კითხვები, თუ ვინ არის ფარული ვიდეოკადრების ავტორი. საჯარო განცხადებიდან მეორე დღეს შინაგან საქმეთა სამინისტრომ პასუხისგებაში მისცა პირი, რომელმაც "დეპუტატის პირადი ცხოვრების ამსახველი კადრები საჯარო სივრცეში პირველმა ატვირთა და გაავრცელა". შინაგან საქმეთა საიმინტროს ინფრომაციით, საქმეზე გამოძიება გრძელდება.