20 ივნისის საქმეზე დაკავებულების ახლობლები თბილისის საქალაქო სასამართლოსთან საპროტესტო აქციას მართავენ. ისინი ე.წ. გავრილოვის პატიმრების გათავისუფლებას მოითხოვენ.

დაკავებული ბესიკ თამლიანის დედა, რუსუდან თამლიანი აცხადებს, რომ მისი შვილი უდანაშაულოა და ქვეყნის სიყვარულის გამო დააკავეს.

"ჩვენი მთავარი მოთხოვნაა უდანაშაულო პოლიტპატიმრები გაათავისუფლონ. ესენი არიან ივანიშვილ-გახარიას პატიმრები. წინააღმდეგ შემთხვევაში არ გავჩერდებით და ვიბრძოლებთ ბოლომდე".

თბილისის საქალაქო სასამართლოში დღეს, 16 სექტემბერს 20 ივნისის საქმის არსებითი განხილვა დაიწყო. ბრალდებულების ადვოკატი ვახტანგ იაშვილი ამბობს, რომ მისი დაცვის ქვეშ მყოფების წინააღმდეგ არანაირი მტკიცებულება არ არსებობს.

"მივუთითებთ იმ მტკიცებულებებზე, რომლებიც ჩემი დაცვის ქვეშ მყოფების უდანაშაულობას ადასტურებს. გავავლებთ ისტორიულ პარალელებს იმ მოვლენებთან, რომელიც იყო უახლოეს წარსულში, მათ შორის 9 აპრილი და სხვა მსგავსი".

ფოტო: ანა ვახტანგაძე / On.ge

20 ივნისის საქმეზე ჯგუფური ძალადობის ორგანიზების, ხელმძღვანელობისა და მასში მონაწილეობის ბრალდებით, პასუხისგებაში მიცემულია 20-მდე პირი, მათ შორის პარლამენტის წევრი, ნიკა მელია, რომელსაც ბრალი ედება ჯგუფური ძალადობის ხელმძღვანელობასა და მასში მონაწილეობაში. ასევე, პოლიტიკოსი, ირაკლი ოქრუაშვილი.