აშშ-ს პრეზიდენტმა, დონალდ ტრამპმა ალ-ქაიდას მოკლული ლიდერის, ოსამა ბინ ლადენის შვილის, ჰამზა ბინ ლადენის სიკვდილი დაადასტურა. როგორც ცნობილია, სპეცოპერაცია ავღანეთისა და პაკისტანის რეგიონში ჩატარდა, თუმცა როდის მოკლეს ჰამზა ბინ ლადენი უწყებები არ აზუსტებენ.

30 წლის ჰამზა ოსამა ბინ ლადენის უმცროსი შვილია. მამის სიკვდილის შემდეგ სწორედ ის განიხილებოდა ალ-ქაიდას ლიდერად. მასზე ინფორმაციისთვის აშშ-მ მილიონიანი ჯილდო დააწესა. მისი სიკვდილის შესახებ ამერიკულმა მედიამ ჯერ კიდევ მიმდინარე წლის აგვისტოში დაწერა.

ოსამა ბინ ლადენი ამერიკულმა სპეცსამსახურებმა სპეცოპერაციის დროს 2011 წელს პაკისტანში მოკლეს. ბინ ლადენის განკარგულებით, 2001 წლის 11 სექტემბრის ტერაქტი დაიგეგმა, რომელსაც სამი ათასზე მეტი ადამიანი ემსხვერპლა. როგორც ოსამა ბინ ლადენის მოპოვებული წერილებიდან ჩანს, ჰამზა მისი საყვარელი შვილი იყო და ალ-ქაიდას მომავალ ლიდერად სწორედ მას განიხილავდა.

ჰამზა ბინ ლადენი ტერორისტების გლობალური სიაში ორი წლის წინ შეიყვანეს. სახელმწიფო დეპარტამენტი აცხადებდა, რომ ის დაქორწინდა ტერორისტ მოჰამედ ატეს შვილზე. მოჰამედ ატემ 2001 წელს ოთხიდან ერთ-ერთი კომერციული თვითმფრინავი გაიტაცა, რომელიც ნიუ-იორკში, მსოფლიო სავაჭრო ცენტრს შეაჯახა.