დეპუტატი ნიკა მელია, რომელსაც სასამართლომ სახლიდან გასვლა შეუზღუდა და ელექტრონული სამაჯური დაუმაგრეს, ტელეკომპანია კავკასიაში მისვლას მაინც გეგმავს. ნიკა მელიას თქმით, ინტერვიუს შესახებ მისმა ადვოკატმა აცნობა პროკურორს, პასუხად კი კატეგორიული უარი მიიღო. ამის შესახებ ნიკა მელია საკუთარ ფეისბუქ გვერდზე ვიდეომიმართვას აქვეყნებს:

"დეპუტატის უფლებამოსილება მათი აზრით ხორციელდება მხოლოდ პარლამენტში და არა ოპოზიციურ ტელევიზიაში. ვაპირებ ბატონ აქუბარდიასთან გადაცემაში მისვლას, შემდეგ კი ვერთვები ინგა გრიგოლიას. რა სისულელეს გააკეთებს ქართული ოცნება წარმოდგენა არ მაქვს. ვერ ამიკრძალავს იმას, რისი აკრძალვის უფლება არ აქვთ. ვარ ისეთივე დეპუტატი, როგორიც დანარჩენი 149. თუ დღეს დავემორჩილები ივანიშვილის ამ იდიოტობას და არ წავალ ტელეკომპანია კავკასიაში, ხვალ შეიძლება მითხრან იგივე წარმატებით, რომ ერთი ოთახიდან მეორეში არ გავიდე".

8 სექტემბერს, გიორგი გახარიას მთავრობისთვის ნდობის გამოცხადების დღეს ნიკა მელია პარლამენტში მივიდა და სიტყვით გამოვიდა. მისი თქმით, სახლიდან გასვლა პროკურორთან შეთანხმებული იყო, თუმცა პრობაციის წარმომადგენლები მაინც მივიდნენ მასთან და ოჯახის წევრები გამოკითხეს, თუ სად წავიდა.

ნიკა მელია მისთვის 20 ივნისის ღამეს ჯგუფური ძალადობის საქმეზე ბრალის წაყენებისა და აღკვეთის ღონისძიების შეფარდების შემდეგ პირველად მივიდა პარლამენტში.

ნიკა მელიას 20 ივნისის საქმეზე აღკვეთის ღონისძიებად გირაო შეეფარდა და სახლიდან გასვლისთვის პროკურატურის ნებართვა სჭირდება. მას ბრალი აქციის მიმდინარეობისას ჯგუფური ძალადობის ხელმძღვანელობის და მასში მონაწილეობისთვის სისხლის სამართლის კოდექსის 225-ე მუხლის პირველი და მეორე ნაწილებით წაუყენეს.