ნაციონალური მოძრაობის ლიდერი გიორგი ტუღუში მარნეულში სოფელ ყიზილაჯლოში საარჩევნო უბნის დარბევაში ქართული ოცნების აქტივისტებს ადანაშაულებს:

"ქართული ოცნების აქტივისტებმა დაარბიეს ყიზილაჯლოს საარჩევნო უბანი, ისროდნენ ქვებს, იყენებდნენ ხელკეტებს, ასევე გატაცებულია საარჩევნო ყუთი, რომელიც წაიღეს უბნიდან და იგი უბანზე რამდენადაც ვიცით არ დაბრუნებულა. პოლიციამ ვერ მაოხერხა ამ ფაქტის პრევენცია. იყო არაეფექტური, ჩვენ გვქონდა ინფორმაცია რომ პოლიციის ნაწილმა დატოვა ტერიტორია, რადგან ვერ უმკლავდებოდნენ ამ თავდამსხმელებს. როგორც ჩანს ქართული ოცნება აგებს არჩევნებს. ეს ისტერია და ძალადობა, რომელიც ჩვენი თვალით ვიხილეთ მარნეულის ერთ-ერთ უბანზე გამოწვეულია იმით, რომ ისინი გრძნობენ და ალბათ იციან რომ აგებენ არჩევნებს".

გიორგი ტუღუში აცხადებს, რომ ჩხუბს წინ უძღოდა ქართული ოცნების კანდიდატის ვიზიტი როგორც ყიზილაჯლოს, ასევე ჯანდარის ერთ-ერთ უბანზე, სადაც მისივე მტკიცებით, იგი ემუქრებოდა გარეთ შეკრებილ ხალხს რომ საერთოდ დაკეტავდა უბანს.