საპარლამენტო უმრავლესობის ლიდერს, გია ვოლსკის გაღიზიანებული ლაპარაკი ჰგონია კითხვა, რომელიც 20 ივნისის ღამეს ხელისუფლების პასუხისმგებლობას შეეხება. ამის შესახებ კითხვა On.ge-ს ჟურნალისტმა დეპუტატს მას შემდეგ დაუსვა, რაც ის 20 ივნისის მოვლენებთან დაკავშირებით სხვების პასუხისმგებლობაზე საუბრობდა.

"თქვენ გაღიზიანებული მელაპარაკებით, რატომღაც და მე გირჩევდით, რომ... მე მაგაზე ბევრჯერ გავაკეთე კომენტარი და თუ გნებავთ, მერე ცალკე კიდევ გავიმეორებ", — უთხრა On.ge-ს ჟურნალისტს ვოლსკიმ და გააგრძელა წინა, ნაციონალური მოძრაობის ხელისუფლების შეცდომებზე საუბარი, რაზეც მოქმედი ხელისუფლება და მმართველი პარტია 7 წელია ლაპარაკობს.

ჟურნალისტმა ამ საკითხზე კიდევ ერთხელ დასვა, რის შემდეგაც ვოლსკიმ თქვა, რომ ხელისუფლებისგან ადეკვატური პასუხია პარლამენტის თავმჯდომარის გადადგომა და დეპუტატის მიერ მანდატის დატოვება.

"გავრილოვის ღამე"

20 ივნისს რუსი კომუნისტი დეპუტატის, სერგეი გავლიროვის ვიზიტით გამოწვეული პროტესტი პოლიციასთან დაპირისპირებაში გადაიზარდა. მთავრობა ამ ფაქტს ოპოზიციას აბრალებს, რასაც ოპოზიცია უარყოფს.

აქციის დაშლისას სამართალდამცავების ნაწილი დამიზნებით ესროდა აქტივისტებსა და ჟურნალისტებს, ასეულობით ადამიანი დაშავდა, რამდენიმემ კი თვალი დაკარგა.

რუსი კომუნისტი დეპუტატის ვიზიტით დაწყებული სირცხვილის ტალღა საზოგადოებამ გიორგი გახარიასკენ მიმართა და მისი გადადგომის მოთხოვნით უწყვეტი საპროტესტო აქციები #სირცხვილია დაიწყო. რამდენიმე ათასი, ათეული და ხანდახან ასეული ადამიანიც თითქმის 80 დღის განმავლობაში რუსთაველის გამზირზე რჩებოდა და ყოველდღიურად უმეორებდა გახარიას, რომ მომხდარი მისი პასუხისმგებლობაა და უნდა გადადგეს.

გახარია ამბობდა, რომ უწყებას მხოლოდ ამ საქმის გამოძიების შემდეგ დატოვებდა, თუმცა რამდენიმე დღის წინ ის პრემიერად წარადგინეს. თავის შემცვლელად კი მან გომელაური წარადგინა.

იმის მიუხედავად, რომ საქმის გამოძიება არ დასრულებულა მაშინდელი შს მინისტრი მალე საქართველოს პრემიერი გახდება.