ახალგაზრდა იურისტთა ასოციაცია ამბობს, რომ გავრცელებული ინფორმაცია, თითქოს მთაწმინდის მე-2 უბანთან ნაციონალური მოძრაობის მხრიდან ამომრჩევლის მოსყიდვას ჰქონდა ადგილი, გადამოწმდა და არ დადასტურდა.

ორგანიზაციის თავჯდომარე, ანა ნაცვლიშვილი ასევე განმარტავს, რომ ნაძალადევის მე-18 უბანზე საიას დამკვირვებელმა მოიპოვა ქართული ოცნების მაჟორიტარი კანდიდატის, სოფო კილაძის მხარდამჭერთა სია, რომელიც, სავარაუდოდ, საარჩევნო უბანზე ერთ-ერთ აქტივისტს დარჩა. საიას თქმით, გადამოწმების შედეგად დადგინდა, რომ ამომრჩეველი მისი თანხმობის გარეშე აღმოჩნდა სიაში:

"აღსანიშნავია, რომ სახელი, გვარი და პირადი ნომერი პირის პერსონალურ ინფორმაციას წარმოადგენს და მისი დამუშავება ამომრჩევლის თანხმობის გარეშე აკრძალულია".

საიას წარმომადგენელი ასევე აცხადებს, სამგორის მე-5 უბანზე რეგისტრატორმა ამომრჩეველს მონაცემთა საარჩევნო სიაში მოძებნამდე გაუკეთა მარკირება, პირადობის მოწმობის შემოწმების გარეშე. დადგინდა, რომ ეს პირი ამ უბანზე არ იყო რეგისტრირებული.
ნაცვლიშვილის თქმით, გარდაბნის მე-6 უბანზე კომისიის წევრები დამკვირვებლებს არ აძლევდნენ უფლებას, ჩანაწერთა წიგნში დაეფიქსირებინათ შენიშვნები საოლქო საარჩევნო კომისიიდან შესაბამისი მითითებების მიღებამდე:

"სენაკში დამკვირვებლებს არ აქვთ შესაბამისი გარემო, რაც გამოიხატება იმით, რომ ისინი არიან იზოლირებულ ოთახში და ვერ ახერხებენ თვალ-ყური ადევნონ პროცესის მიმდინარეობას. ზუგდიდის 93-ე უბანზე საიას დამკვირვებელს უარი უთხრეს საჩივრის დარეგისტრირებაზე".