ქართული ოცნების ოფისთან, სადაც პოლიტსაბჭოს სხდომა იწყება, აქცია #სირცხვილიას მონაწილეები იკრიბებიან. სხდომა დღეს 9 საათზე, სავარაუდოდ, უკვე დაიწყო. მთავარ შესასვლელთან უმრავლესობის წევრები არ გამოჩენილან და არ გაუკეთებიათ განცხადებები. ბევრი მათგანი შენობის უკანა ავტოსადგომიდან შევიდა.

ფოტო: გვანცა ნემსაძე / On.ge

ფოტო: გვანცა ნემსაძე / On.ge

დღეს პოლიტსაბჭო პრემიერ-მინისტრის კანდიდატურასთან დაკავშირებით მსჯელობს. მედიაში გავრცელებული ინფორმაციით, ამ პოსტს, სავარაუდოდ, შს მინისტრი გიორგი გახარია დაიკავებს. სწორედ. მის გადადგომას ითხოვენ უკვე თითქმის სამი თვეა #სირცხვილიას წევრები.

აქციის ორგანიზატორი გიგა მაქარაშვილი ამბობს, რომ შემოდგომის დაწყებასთან ერთად ისინი კიდევ უფრო გააქტიურდებიან:

“მზად ვართ ყველა ფრონტზე ვიყოთ აქტიური. ოცნება უნდა მიხვდეს, რომ არ დავღლილვართ. გახარიას გაპრემიერება იქნება კიდევ ერთი განაცხადი, რომ მას საერთოდ არ აინტერესებს, რას აპროტესტებს ხალხი. ეს კიდევ უფრო აწევს ტემპერატურას”.

აქციის მონაწილეების შეკრების პარალელურად ქართული ოცნების ოფისთან განლაგდა პოლიციის ეკიპაჟები.

პრემიერ-მინისტრმა მამუკა ბახტაძემ თანამდებობა გუშინ, 2 სექტემბერს ფეისბუქპოსტით დატოვა. ის პარლამენტმა 2018 წლის ივლისში დაამტკიცა. მან პრემიერის თანამდებობაზე ისე იმუშავა, რომ პარლამენტში ანგარიში არ წარუდგენია.

გაიგეთ მეტი: