საგანგებო სიტუაციების მართვის სამსახურის ინფორმაციით, გორის მუნიციპალიტეტის სოფელ საყვარესთან ტყის ხანძრის ფართობი 10 ჰექტარს არ აჭარბებს. უწყების განცხადებით, 40 ჰექტარზე ძლიერი დაკვამლიანება შეინიშნებოდა.

უწყებაში აცხადებენ, რომ ტყის ხანძრების ჩაქრობაში მთელი ღამის განმავლობაში ჩართული იქნება 10 სახანძრო და სამი სამაშველო მანქანა, 9 დამხმარე ტექნიკა, 170 მეხანძრე-მაშველი. გათენებისთანავე ხანძრის ქრობის სამუშაოებში ჩაერთვება სასაზღვრო პოლიციის სამი ვერტმფრენი.

მათივე თქმით, ადგილზე მოწყობილია საველე შტაბი, საიდანაც მიმდინარეობს ტყის ხანძრის ქრობის სამუშაოების კოორდინაცია. ოპერაციაში ჩართულია როგორც შიდა ქართლის ყველა მუნიციპალიტეტის, ასევე სამცხე-ჯავახეთის და თბილისის სახანძრო-სამაშველო ჯგუფები.