ახალი ზელანდიის პარლამენტის სპიკერი, ტრევორ მალარდი სხდომას ბავშვით ხელში უძღვებოდა. წარმომადგენლობითი პალატის წევრების დებატების დროს სპიკერი ბავშვს არწევდა და ბოთლიდან აჭმევდა.

ტრევორ მალარდს ხელში ერთ-ერთი დეპუტატის, ტამატი კოფის ჩვილი ეკავა. მან ტვიტერზე დაპოსტა, რომ, ზოგადად, სპიკერის სავარძელს თავმჯდომარე იკავებს, მაგრამ დღეს ეს ადგილი VIP სტუმარმაც დაიკავა. სოციალურ ქსელში ტრევორ მარადის ამ ქმედებას დადებითი რეაქცია მოჰყვა.

ახალი ზელანდიის პარლამენტის დეპუტატმა, ტამატი კოფიმ და მისმა პარტნიორმა შვილი სუროგატი დედის დახმარებით გააჩინეს. პარლამენტის სხდომაზე შვილის მიყვანა დეპუტატების დიდმა ნაწილმა მოიწონა.

ტამატი კოფი შვილთან ერთად

ფოტო: Gareth Hughes

ბოლო რამდენიმე წლის განმავლობაში პოლიტიკოს დედებს თავიანთი შვილები პარლამენტის სხდომებზე ხშირად დაჰყავთ, რაც მომუშავე დედების გაძლიერებასა და წახალისებას ემსახურებოდა. 2018 წელს ახალი ზელანდიის პრემიერ-მინისტრი ჯასინდა არდერნი 25 სექტემბერს გაეროს გენერალურ ასამბლეას სამი თვის შვილთან ერთად დაესწრო. ამ ფაქტმა დიდი აჟიოტაჟი გამოიწვია, რადგან არდერნი გახდა პირველი ქალი ლიდერი, რომელიც გენერალურ ასამბლეას ჩვილთან ერთად დაესწრო. ასამბლეის პერიოდში კი შვილს მისმა პარტნიორმა, კლარკ გეიფორდმა მოუარა.