საქართველოს ბირთვული და რადიაციული უსაფრთხოების სააგენტოს აცხადებს, რომ რუსეთში მომხდარ აფეთქებას საქართველოზე არანაირი გავლენა არ მოუხდენია. როგორც On.ge-ს სააგენტოს ხელმძღვანელმა, ვასილ გედევანიშვილმა განუმარტა, ამას ადასტურებს საქართველოში განლაგებული მონიტორინგის სადგურები და საერთაშორისო პარტნიორების მონაცემებიც.

საქართველო ატომური ენერგიის საერთაშორისო სააგენტოს წევრი ქვეყანაა. ამ ორგანიზაციის წევრების ვალდებულებაა მსგავს ინციდენტებზე და რადიაციის დონის ზრდაზე ინფორმაციის გაზიარება, რათა გააფრთხილონ ქვეყნები შესაძლო რისკზე. გედევანიშვილის თქმით, სააგენტოსთან კომუნიკაცია ჰქონდათ და რადიაციის ზრდას არც ისინი ადასტურებენ.

გარდა ამისა, გედევანიშვილი განმარტავს, რომ შემთხვევის ადგილიდან საქართველო 3000 კილომეტრითაა დაშორებული და საფრთხე უფრო ნაკლებია. მისი თქმით, ჰქონდათ კომუნიკაცია უფრო ახლოს მყოფ ქვეყნებთან, უკრაინასა და ნორვეგიასთან და გამოსხივების მატება არც იქ დაფიქსირებულა. მისივე თქმით, ნორვეგიაში დაფიქსირდა იოდის ნიშნულის მცირედი ზრდა და ამ ინფორმაციამ საზოგადოება შეაშფოთა, თუმცა მსგავსი შემთხვევები ქვეყანაში აქამდეც ყოფილა და ამ ინციდენტს არ უკავშირებენ.

რუსეთში, არხანგელსკის რეგიონში აფეთქება 8 აგვისტოს მოხდა, შედეგად ორი ადამიანი გარდაიცვალა. უცხოური მედიის ინფორმაციით, აფეთქებით რადიაციის დონე გაიზარდა. ამავეს წერს, რუსეთის სახელმწიფო საკუთრებაში არსებული სააგენტო Tass. მათი თქმით, აფეთქების ტერიტორიასთან ახლომდებარე ქალაქ სევეროდვინსკში რადიაციის დონე მოულოდნელად გაიზარდა. თავდაცვის მინისტრი კი საპირისპიროს ამტკიცებს, მისი განმარტებით, რადიაციის დონე ნორმალურია და ატმოსფეროსთვის ზიანს არ წარმოადგენს.

ზოგიერთი ადგილობრივი მედია ავრცელებდა ინფორმაციას, რომ აფეთქება მოხდა გემბანზე, რუსები სამხედრო მოხსენებაში ამბობდნენ, რომ აფეთქება ხმელეთზე მოხდა. რუსეთის უწყებები აგრძელებენ სამხედრო ინსტალაციების დამალვას ამ რეგიონში, სადაც ბირთვული წყალქვეშა ნავები ჰყავთ განლაგებული.

თავდაპირველად გავრცელებული ცნობების თანახმად, რადიაციის დონე გაზრდილი იყო ქალაქ ნინოოკის მახლობლადაც. ეს ქალაქი ბირთვული რაკეტების გამოსაცდელი ადგილია.

The Guardian წერდა, რომ ამ კვირის დასაწყისში, ციმბირში, საბრძოლო მასალის საცავში გაჩენილმა ცეცხლმა 16 500-ზე მეტი ადამიანი იძულებული გახადა დაეტოვებინათ საკუთარი სახლები. აფეთქებული ჭურვები რამდენიმე კილომეტრის მანძილზე დაფრინავდნენ. ხანძრის შედეგად დაიღუპა ერთი და დაშავდა 13 ადამიანი. მეხანძრეებს ცეცხლის ჩასაქრობად 16 საათზე მეტი დასჭირდათ. გამომძიებლები ციმბირში აფეთქებას დაუდევრობას უკავშირებენ და ხანძარს "ადამიანურ ფაქტორებს" აბრალებენ.