ენმ-ს წევრმა, დავით ბაქრაძემ დღეს წინასაარჩევნო კამპანია შეაჯამა. მან განაცხადა, რომ პარტიას ეკონომიკის განვითარების, სამუშაო ადგილების შექმნის და მოსახლეობისთვის უმჯობესი პირობების შექმნისთვის კონკრეტული გეგმა აქვს:

"ამით ჩვენი კამპანია რადიკალურად განსხვავდება ხელისუფლების კამპანიისგან, რომელმაც მთელი ეს თვეები გაატარა მოსახლეობის დაშინებაში, დაზაფრვაში, სისხლისღვრებზე, გადატრიალებებზე ლაპარაკში".

ბაქრაძე აცხადებს, რომ ნაციონალური მოძრაობა არის პირველი პარტია, რომლის ყველა მაჟორიტარი დეპუტატობის კანდიდატმა კარდაკარ შემოიარა ოჯახები და პირადად გაეცნო მოსახლეობის პრობლემებს. მისი თქმით, ისინი 307 ათას ოჯახში იყვნენ ანუ ქვეყნის ყოველ მესამე ოჯახში.

ერთიანი ნაციონალური მოძრაობის ლიდერი აღნიშნავს, რომ მთავრობის მიდგომა, თითქოს ქვეყანაში ყველაფერი რიგზეა და ხალხს ანალიზის უნარი არ გააჩნია, არასწორია და რეალურად ოჯახებს მხარში დგომა სჭირდებათ.

ბაქრაძის თქმით, ხვალ ნაციონალური მოძრაობა გაიმარჯვებს და ქვეყანას ეყოლება ხელისუფლება, რომელსაც თავისი თვალით აქვს ნანახი ხალხის პრობლემები.