საქართველოს ექსპრეზიდენტის, მიხეილ სააკაშვილის განცხადებით, რუსეთს არ დაუმალავს, რომ საქართველოში ომის დაწყებას აპირებდა. ამის შესახებ მან ომისა და მშვიდობის გაშუქების ინსტიტუტისთვის (IWPR) მიცემულ ინტერვიუში განაცხადა.

სააკაშვილის თქმით, საქართველოს სრული განადგურება ემუქრებოდა და ამის შესახებ აშშ-ს სახელმწიფო მდივანს კონდოლიზა რაისს რუსეთის საგარეო საქმეთა მინისტრმა სერგეი ლავროვმა უთხრა. სააკაშვილის თქმით, კონდოლიზა რაისი ლავროვს ომის დაწყებიდან მესამე დღეს შეხვდა.

"მან იკითხა, რა მიზანი ჰქონდა რუსეთს საქართველოსთან დაკავშირებით, პასუხად მიიღო — სრული განადგურება", — ამბობს სააკაშვილი.

მისი თქმით, მაშინ საქართველო მოწყვლადი იყო და დრო სჭირდებოდა: "რუსეთმა, საკუთარი დრო სწორად შეარჩია. ისინი არ მალავდნენ საკუთარ განზრახვებს. მე მახსოვს, რომ ისინი ეუბნებოდნენ დასავლელ პარტნიორებს ამის შესახებ. რუსეთის თავდაცვის მინისტრი, იური ბალუევსკი შეხვდა ნატოს ელჩებს ბრიუსელში, მარტში და უთხრა მათ, რომ ისინი დაიწყებდნენ ომს საქართველოში, პირდაპირ მათ წინ თქვა ეს. იგივე მოხდა 2008 წლის მაისში, სოჭში ვლადიმერ პუტინისა და ჯორჯ ბუშის შეხვედრის დროს. ყოფილმა ამერიკელმა დიპლომატმა მეთიუ ბრაიზამ მომიყვა, რა მოხდა იქ. მან თქვა, რომ პუტინი ყვიროდა "საქართველოში ომი იქნება". მახსოვს, დამცინავად ვკითხე, თუ რა უპასუხა ბუშმა. მეთიუ ბრაიზამ მითხრა — "არაფერი". რატომ? მათ უკვე იცოდნენ ჩვენი პოზიცია. ამას პუტინი აღიქვამდა, როგორც სისუსტეს და მწვანე შუქს, რომელიც აშშ-მ აუნთო. ბუში უნდა დამდგარიყო პუტინის პირდაპირ, უნდა ჩაეხედა თვალებში და ეთქვა: "გაჩერდი, არ გაბედო ამის გაკეთება".

სააკაშვილის თქმით, ეს იყო პერიოდი, როცა ბუშს სთხოვდა დაენიშნა საქართველოში ელჩი, ის თითქმის დათანხმდა, თუმცა კონდოლიზა რაისი წინააღმდეგი იყო.

მისივე თქმით, მდგომარეობა 2008 წლის მაისში დაიძაბა. ამ პერიოდში პუტინი მას დაემუქრა, თუმცა სააკაშვილმა იფიქრა, რომ ეს დიპლომატიური თამაშის ნაწილი იყო. მან თქვა, რომ სერიოზულად მიიღო, თუმცა ტაქტიკად მიიჩნია.

საქართველოს ყოფილა პრეზიდენტმა მიხეილ სააკაშვილმა ომისა და მშვიდობის გაშუქების ინსტიტუტისთვის მიცემულ ინტერვიუში რამდენჯერმე აღნიშნა, რომ დასავლელი მეგობრები არწმუნებდნენ, რუსეთი არ შემოიჭრებოდა.