იუსტიციის საბჭოს მოსამართლე წევრი ირაკლი შენგელია ფიქრობს, რომ ნაზი ჯანეზაშვილის მხრიდან უზენაესის მოსამართლეობის კანდიდატის, გიორგი მიქაუტაძისთვის სხვა კანდიდატებთან შედარებით მეტი კითხვის დასმა დისკრიმინაციაა. ამის შესახებ შენგელიამ მიქაუტაძის გასაუბრების დროს განაცხადა.

მან მოუწოდა ნაზი ჯანეზაშვილს დაასრულოს კითხვების დასმა, რადგან ის "უკვე ორი საათია მიქაუტაძეს ესაუბრება".

"დისკრიმინაციულ მიდგომას აქვს ადგილი. მე მესმის, რომ იუსტიციის საბჭოს მოქმედი მდივანია გასაუბრებაზე. ორი საათია მხოლოდ თქვენ ეკითხებით, არიან კანდიდატები, სადაც კითხვას არ სვამთ, ეს არ არის დისკრიმინაციული მიდგომა, რომ ზუსტად 2 საათია ეკითხებით გიორგი მიქაუტაძეს? გუშინ, როინ მიგრიაულის გასაუბრებისას არც კი მოგითხოვიათ კითხვა. თუ მიდიოდით და გნებავდათ წასვლა და ასეთ ადგილებში უნდა წახვიდეთ, გეთხოვათ, რომ წასასვლელები ხართ. თქვენ ისე გინდათ წარმოადგინოთ, რომ ჩვენ თქვენ გუშინ შეგზღუდეთ და კითხვა არ დაგასმევინეთ. ეს ასე არ იყო, თქვენ არ გითხოვიათ კითხვა", — განაცხადა ირაკლი შენგელიამ.

ნაზი ჯანეზაშვილის თქმით, ეს დისკრიმინაცია არ არის და გუშინდელ სხდომასთან დაკავშირებით ოქმი არსებობს. "გუშინ მე ხელი ავიწიე და მოვითხოვე სიტყვა და ველოდებოდი, რომ ჩემი სიტყვის დრო დადგებოდა, მაგრამ თქვენ გაგიგრძელდათ, შემდეგ დიმიტრი გვრიტიშვილს, თვითმარქვია თავმჯდომარეს, გამოვრჩი", — თქვა ნაზი ჯანეზაშვილმა.

ირაკლი შენგელიამ უპასუხა, რომ მას უნდა კითხვის უფლება ხმამაღლა ისე, "როგორც ამას აკეთებს ხოლმე". ის ამბობს, რომ ჯანეზაშვილი ცრუობს და კითხვის დროზე ადრე დასმა არავის შეუზღუდია. ჯანეზაშვილის თქმით, მან ხელი აიწია და "საბავშვო ბაღი არ არის, რომ იფიქროს, ვერ დაინახეს".

"რამდენი ხანი უნდა ავწიო ხელი, რომ მიხვდეთ კითხვის დასმა მინდა?", — იკითხა ნაზი ჯანეზაშვილმა. სხდომის წამყვანის დიმიტრი გვრიტიშვილის თქმით, "მას ნაზი ჯანეზაშვილის აწეული ხელი არ დაუნახავს".

მას შემდეგ, რაც ნაზი ჯანეზაშვილმა მიქაუტაძესთან გასაუბრება დაასრულა, აღმოჩნდა, რომ საბჭოში მოსამართლე წევრებიდან კითხვის მსურველი აღარ იყო.