საქართველოს სახალხო დამცველი უჩა ნანუაშვილი შსს-ს მოუწოდებს, რომ რაც შეიძლება სწრაფად გამოიძიოს გივი თარგამაძის მანქანის აფეთების საქმე, რადგან მისი თქმით ეს ფაქტი აზიანებს წინასაარჩევნო პროცესსა და ქვეყნის იმიჯს:

"ეს არის საგანგაშო ფაქტი. როდესაც წინასაარჩევნო პერიოდში ასეთი რამ ხდება, ესაა ქვეყნის იმიჯისთვის და წინასაარჩევნო პროცესისთვის საგანგაშო ფაქტი და საკმაოდ სერიოზული დარტყმა. შსს-მ ცხელ კვალზე უნდა გახსნას აღნიშნული დანაშაული".

აუცილებელია ამ საქმის დროული გამოძიება, გამომდინარე მისი სიმძიმიდან, რადგან ამ ძალადობას შესაძლოა სერიოზული გავლენა ჰქონდეს წინასაარჩევნო გარემოზე.

უჩა ნანუაშვილმა პარტიებს ამ თემაზე პოლიტიკური განცხადებებისგან თავის შეკავებისკენ მოუწოდა.

4 ოქტომბერს, თბილისში, კოლმეურნეობის მოედნის მიმდებარე ტერიტორიაზე ნაციონალური მოძრაობის წევრის, გივი თარგამაძის მანქანა აფეთქდა. დაზიანდა მიმდებარე შენობები, ასევე ახლომდებარე ავტომობილები, დაშავდნენ გამვლელები. ჯანდაცვის მინისტრის ინფორმაციით, მანქანის აფეთქებისას დაშავებულთა რიცხვი ხუთია. მათგან ერთ-ერთს საავადმყოფოში ოპერაცია ჩაუტარდა.

შსს-მ გამოძიება დამამძიმებელ გარემოებაში, განზრახ მკვლელობის მცდელობის მუხლით დაიწყო.

გივი თარგამაძე დარწმუნებულია, რომ მისი ავტომობილი მართვადი ასაფეთქებლით ააფეთქეს და პასუხისმგებლობას ხელისუფლებას აკისრებს.